Telegram ارنالاردىڭ بىرىندە اقمولا وبلىسى قورعالجىن اۋدانىنىڭ پروكۋرورى قىلمىستى جاسىرىپ-جاۋىپ وتىرعانى جونىندە اقپارات تارادى،- دەپ حابارلايدى Dalanews.kz

ارنا مالىمەتىنشە، قورعالجىن اۋدانىنىڭ پوليسياسىنا "اق قۇلىن" ج ش س ارىزدانعان. شارۋاشىلىقتان 486 جىلقى مەن 24 باس ءىرى قارا مال ۇرلانعان. شىعىن كولەمى 278 570 000 تەڭگەگە جەتكەن.

"اق قۇلىن" ج ش س بۋحگالتەرلىك ەسەپتىڭ قۇجاتتارىن ۇسىنعان. الايدا پوليسيا راستالماعانىن ايتىپ، ءىستى تىركەۋدەن باس تارتقان. قورعالجىن اۋدانىنىڭ پوليسيا باستىعى دارحان قۋانىشيەۆ ارىز بەرۋشىلەردى اۋديتورلارعا باعىتتاعان. دارحان ەرمەك ۇلىنىڭ پىكىرىنشە، زالالدى تەك اۋديتورلار باعالاي الادى"، - دەپ جازىلعان ارنا مالىمەتىندە.

جەلىدە تاراعان اقپاراتتا اۋداندىق پروكۋروردىڭ ەسىمى دە اتالعان.

"اۋداندىق پروكۋرور جاسۇلان كەمەلبەكوۆ بۇل وقيعانىڭ بارلىعى "ازاماتتىق-قۇقىقتىق" داۋ دەپ ەسەپتەگەن. ءبىر قىزىعى، مال ۇرلىعى جاسالعان، قۇجاتتارى بار، زالال كولەمى 278 ميلليون تەڭگەگە جەتەدى. ءبىراق قورعالجىن اۋدانىنىڭ پروكۋرورى مەن پوليسيا باستىعى ارىزدى قابىلداۋدان باس تارتىپ وتىر. بىلايشا ايتقاندا، شەنەۋنىكتەر قابىلەتسىز ەكەنىن كورسەتىپ وتىر. ءىس قوزعاۋدان باس تارتۋ ارقىلى پروكۋرور كەمەلبەكوۆ پەن پوليسيا باستىعى قۋانىشيەۆ قىلمىستى جاسىرىپ وتىر ما؟" - دەلىنگەن ارنا اقپاراتىندا.

ۇندەۋ اۆتورى اقمولا وبلىسىنىڭ پروكۋرورى رۋفات قۇتتىقوۆ پەن پوليسيا دەپارتامەنتىنىڭ باستىعى نۇرسۇلتان مۇقاشيەۆتەن وسى ىسكە ارالاسۋدى سۇراعان.