Telegram arnalardyń birinde Aqmola oblysy Qorǵaljyn aýdanynyń prokýrory qylmysty jasyryp-jaýyp otyrǵany jóninde aqparat tarady,- dep habarlaıdy Dalanews.kz

Arna málimetinshe, Qorǵaljyn aýdanynyń polısıasyna "Aq Qulyn" JSHS aryzdanǵan. Sharýashylyqtan 486 jylqy men 24 bas iri qara mal urlanǵan. Shyǵyn kólemi 278 570 000 teńgege jetken.

"Aq Qulyn" JSHS býhgalterlik eseptiń qujattaryn usynǵan. Alaıda polısıa rastalmaǵanyn aıtyp, isti tirkeýden bas tartqan. Qorǵaljyn aýdanynyń polısıa bastyǵy Darhan Qýanyshev aryz berýshilerdi aýdıtorlarǵa baǵyttaǵan. Darhan Ermekulynyń pikirinshe, zalaldy tek aýdıtorlar baǵalaı alady", - dep jazylǵan arna málimetinde.

Jelide taraǵan aqparatta aýdandyq prokýrordyń esimi de atalǵan.

"Aýdandyq prokýror Jasulan Kemelbekov bul oqıǵanyń barlyǵy "azamattyq-quqyqtyq" daý dep eseptegen. Bir qyzyǵy, mal urlyǵy jasalǵan, qujattary bar, zalal kólemi 278 mıllıon teńgege jetedi. Biraq Qorǵaljyn aýdanynyń prokýrory men polısıa bastyǵy aryzdy qabyldaýdan bas tartyp otyr. Bylaısha aıtqanda, sheneýnikter qabiletsiz ekenin kórsetip otyr. İs qozǵaýdan bas tartý arqyly prokýror Kemelbekov pen polısıa bastyǵy Qýanyshev qylmysty jasyryp otyr ma?" - delingen arna aqparatynda.

Úndeý avtory Aqmola oblysynyń prokýrory Rýfat Quttyqov pen Polısıa departamentiniń bastyǵy Nursultan Muqashevten osy iske aralasýdy suraǵan.