ەمحانا قۇرىلىسى مەملەكەت باسشىسىنىڭ 2024 جىلعى تامىز ايىندا قوسشى قالاسىنا جاساعان جۇمىس ساپارى بارىسىندا باستاۋ العان بولاتىن. دەنساۋلىق ساقتاۋ مەكەمەسى ءبىر اۋىسىمدا مىڭ ادامدى قابىلداي الادى، دەپ حابارلايدى Dalanews.kz
ەمحانا العاشقى مەديسينالىق-سانيتارلىق، شۇعىل، جوسپارلى، مامانداندىرىلعان جانە جوعارى تەحنولوگيالىق مەديسينالىق كومەك كورسەتۋگە ارنالعان زاماناۋي جوعارى تەحنولوگيالىق جابدىقتارمەن قامتىلعان. مەديسينالىق مەكەمە قوسشى قالاسىنىڭ 100 مىڭنان استام تۇرعىنىنا قىزمەت كورسەتەدى.
جوبانىڭ ينۆەستورى – «VIAMEDIS KOSSHY» ج ش س، جالپى قۇنى شامامەن 30 ملرد تەڭگەنى قۇرايدى. جوبا مەملەكەتتىك بيۋدجەتتەن قارجى بولىنبەي، كومپانيانىڭ جەكە قاراجاتى ەسەبىنەن تولىقتاي جۇزەگە اسىرىلدى.
دەنساۋلىق ساقتاۋ ءمينيسترى اقمارال ءالنازاروۆا قوسشى تۇرعىندارىن قالا ومىرىندەگى ماڭىزدى وقيعامەن قۇتتىقتاپ، ەمحانا ۇجىمىنا ساتتىلىك تىلەدى.
جىل سوڭىنا دەيىن 350 توسەك-ورىنعا ارنالعان ستاسيوناردىڭ قۇرىلىسى اياقتالادى دەپ جوسپارلانۋدا، ونىڭ ىشىندە قوسشى قالاسى مەن اقمولا وبلىسىنىڭ شورتاندى، ەرەيمەنتاۋ، ەگىندىكول، ارشالى، قورعالجىن، سەلينوگراد جانە استراحان اۋداندارى تۇرعىندارىنا ارنالعان 50 رەابيليتاسيالىق توسەك قاراستىرىلعان. جالپى ەمحانا مەن ستاسيوناردا 700-دەن استام تۇراقتى جۇمىس ورنى اشىلادى. سونداي-اق ينۆەستور مەديسينالىق قىزمەتكەرلەرگە ارنالعان پانسيونات پەن تۇرعىن ءۇي سالۋدى جوسپارلاپ وتىر.
«ەمحانا حالىقارالىق ستاندارتتارعا ساي سالىنعان. قۇرىلىس باستالعان ساتتەن باستاپ ءبىز رەانيماسيالىق جانە رەابيليتاسيالىق بولىمشەلەرگە قاجەتتى جابدىقتار بويىنشا ءوز ۇسىنىستارىمىزدى بەردىك. بۇل جوبانىڭ بولاشاعى زور»، – دەپ پىكىر ءبىلدىردى «ەڭبەك ەرى» اتاعىنىڭ يەگەرى، جوعارى ساناتتى نەيروحيرۋرگ-دارىگەر، مەديسينا عىلىمدارىنىڭ دوكتورى، سەرىك اقشولاقوۆ
ايتا كەتەيىك، سوڭعى ەكى جىلدا اقمولا وبلىسىندا 38 مەديسينالىق نىسان سالىندى. بۇل اۋىلدىق ەلدى مەكەندەردىڭ 75 مىڭنان استام تۇرعىنىنا مەديسينالىق كومەككە قولجەتىمدىلىكتى قامتاماسىز ەتتى. ءىرى جوبالاردىڭ ءبىرى – ءبىرجان سال اۋدانىندا سالىنعان كوپسالالى اۋدانارالىق اۋرۋحانا. سونىمەن قاتار اتباسار اۋداندىق اۋرۋحاناسىنىڭ نەگىزگى كورپۋسى كۇردەلى جوندەۋدەن ءوتتى، كوكشەتاۋ قالاسىندا 630 توسەك-ورىنعا ارنالعان كوپسالالى اۋرۋحانانىڭ قۇرىلىسى جۇرگىزىلۋدە، وبلىستىق بالالار اۋرۋحاناسىنىڭ التى قاباتتى كورپۋسى جوندەۋى جۇرگىزىلۋدە، «بولاشاق» وڭالتۋ ورتالىعىنىڭ كۇردەلى جوندەۋى اياقتالدى.
