اقمولا وبلىسى اقكول اۋداندىق سوتى اۋداندىق ءبىلىم ءبولىمىنىڭ باسشىسىن اكىمشىلىك جاۋاپكەرشىلىككە تارتىپ، ايىپپۇل سالدى. ول مەملەكەتتىك ساتىپ الۋ شارتتارىن جاساعاندا مۇددەلەر قاقتىعىسى تۋرالى باسشىلىقتى ەسكەرتپەگەن، دەپ حابارلايدى Dalanews.kz.

سوتتا انىقتالعانداي، شەنەۋنىك بىرنەشە كەلىسىمشارتقا قول قويعان. ءبىراق بۇل كەلىسىمدەر ءوزىنىڭ كۇيەۋ بالاسى باسقاراتىن جەكە كاسىپكەرلىكپەن جاسالعانى بەلگىلى بولدى. قولدانىستاعى زاڭناماعا سايكەس، مەملەكەتتىك قىزمەتكەر مۇنداي جاعدايدا مىندەتتى تۇردە جازباشا تۇردە باسشىلىقتى حاباردار ەتۋى كەرەك بولعان. الايدا ول بۇل تالاپتى ورىنداماعان.

زاڭ بويىنشا مەملەكەتتىك قىزمەتكەرلەرگە جاقىن تۋىستارى مەن قايىن جۇرت وكىلدەرىنىڭ مۇددەسىنە جۇمىس ىستەۋگە، ياعني ءوز وكىلەتتىگىن ولار ءۇشىن پايدالانۋعا تىيىم سالىنعان. ال قىزمەتكە ورنالاسۋ كەزىندە ول بۇل ەرەجەلەردى ساقتاۋ جونىندەگى مىندەتتەمەگە قول قويعان.

سوت ونىڭ بۇل ارەكەتى العاش رەت ورىن العانىن ەسكەرىپ، 100 ايلىق ەسەپتىك كورسەتكىش كولەمىندە ايىپپۇل سالدى. اكىمشىلىك كودەكسكە سايكەس ايىپپۇلدى ەرىكتى تۇردە مەرزىمىنەن بۇرىن تولەگەن جاعدايدا بەرىلەتىن جەڭىلدىكپەن ونىڭ كولەمى 275 240 تەڭگەنى قۇرادى. ۇكىم زاڭدى كۇشىنە ەندى.