"اقباقاي" كەن ورنىن 1968 جىلى بەلگىلى گەولوگ دۇبەك دۇيسەنبەكوۆ اشقان بولاتىن. قوردى تولىق يگەرۋ جۇمىستارى 1975 جىلى باستالدى.
اقباقايدا جاڭا كەن قورىنىڭ اشىلۋىنا بايلانىستى شيكىزاتتى قايتا وڭدەۋ ءۇشىن وراسان قۋات قاجەت بولعاندىقتان كەن وڭدەۋدىڭ زاماناۋي سەحى سالىندى. بۇگىندە التىندى فابريكاعا قاراستى "اقباقاي"، "بەسكەمپىر"، "كارەرنوە"، "اقساقال"، "سۆەتينسكوە"، "كەنجەم"، "شىعىس اقباقاي" جانە "وليمپييسكوە" كەن ورىندارى وندىرەدى.
وندىرىلگەن پايدالى قازبا فابريكادا وڭدەلىپ، ودان دورە قورىتپاسى تۇرىندەگى دايىن ءونىم شىعارىلادى. تەحنولوگيالىق ۇدەرىستىڭ تولىق اينالىمى SCADA اۆتوماتتاندىرىلعان باسقارۋ جۇيەسى ارقىلى جۇرگىزىلەدى.
– ەكىنشى كەزەڭدى ىسكە قوسۋدىڭ ناتيجەسىندە كومپانيامىزدىڭ وندىرىستىك اۋقىمى كەڭەيەدى. بۇل ءوز كەزەگىندە ەل ەكونوميكاسىنىڭ دامۋىنا تىڭ سەرپىن بەرەدى دەپ ويلايمىز. بۇعان قوسا، قوسىمشا جۇمىس ورىندارى اشىلادى. اتاپ ايتقاندا، جوبانى ىسكە قوسۋ ارقىلى قوسىمشا 90 جاڭا جۇمىس ورنى اشىلادى، – دەيدى "التىنالماس اك" اق قاراعاندى جانە جامبىل وبلىستارىنداعى ءوندىرىس بويىنشا باسقارۋشى ديرەكتورى باعدات باحراموۆ.
2011-2015 جىلدارى ارالىعىندا «التىنالماس» كاسىپورنى اقباقايداعى جەراستى ءوندىرىسى تەحنولوگياسىن قول ەڭبەگى ادىسىنەن مەحانيكالاندىرىلعان ادىسكە كوشىردى. بۇل باستاما ءوندىرىس قۋاتىنىڭ 600 پايىزعا ارتۋىنا ىقپال ەتتى.
ءوندىرىستى سيفرلاندىرۋ باعدارلاماسى اياسىندا بۇگىنگى تاڭدا كەن ورنى جەراستى ستاسيونارلىق قۇرالدارمەن جابدىقتالىپ، اشىق تاۋ-كەن جۇمىستارىن باسقارۋ اۆتوماتتاندىرىلدى، گەولوگيالىق-ماركشەيدەرلىك جاساقتاماسى مەن GEOVIA ينتەگراسيالىق پلاتفورماسى ەنگىزىلدى. سونىمەن قاتار ۇزىندىعى 130 شاقىرىم تالشىقتى-وپتيكالىق بايلانىس جەلىسى تارتىلىپ، 400 مەتر تەرەڭدىكتە جەراستى Wi-Fi ورناتىلدى.
جاڭا تەحنولوگيالارعا يەك سۇيەگەن ەلىمىزدىڭ دامۋىنا تىڭ سەرپىلىس بەرىپ، ونىمدىلىكتى ارتتىرا تۇسەتىنى بەلگىلى.
