اقبايان مۇقانعاليەۆانىڭ جاقىندارى ونىڭ سۇلتان سەرسەمەليەۆپەن قالاي تانىسقانىن ايتىپ بەردٸ. ولاردىڭ سٶزٸنشە, اقبايان مەكتەپ بٸتٸرگەن سوڭ اقتٶبە قالاسىندا زاڭگەر ماماندىعى بويىنشا بٸلٸم العان. كەيٸن اتىراۋعا قونىس اۋدارىپ, جەرمەڭكەدە جۇمىس ٸستەپ جٷرگەن كەزٸندە سۇلتانمەن تانىسقان, دەپ حابارلايدى dalanews.kz.
ەكەۋٸ 2016 جىلى وتباسىن قۇرعان. الايدا تۋىستارىنىڭ ايتۋىنشا, دٷركٸرەتٸپ ٷلكەن توي جاسالماعان. كٷيەۋ جٸگٸت جاعى قىز الىپ قاشۋ دەستٷرٸن قولدانعان. كەيٸن ەكٸ تاراپتىڭ تۋىستارى كەزدەسٸپ, تانىسىپ, شاعىن وتىرىس ٶتكٸزگەن. بۇل نەكەدەن بەس بالا دٷنيەگە كەلگەن.
وتباسىلىق ٶمٸر بٸرقالىپتى بولماعان. 2022 جىلى اقبايان ٷش بالاسىن ەرتٸپ, اتا-اناسىنىڭ ٷيٸنە كەتٸپ قالعان. جاقىندارىنىڭ ايتۋىنشا, اناسى قىزىنىڭ ەنەسٸمەن بٸرگە تۇرعانىن قالاماعان جەنە ولاردىڭ اتىراۋدا بٶلەك تۇرۋىن قالاعان. ال سۇلتان ٶز اتا-اناسىن تاستاپ كەتۋگە قارسى بولعان. وسى كەلٸسپەۋشٸلٸكتەن كەيٸن ەرلٸ-زايىپتىلاردىڭ اراسى الىستاپ, كەيٸن رەسمي تٷردە اجىراسقان.
دەگەنمەن كٶپ ۇزاماي ەكەۋٸ قايتا تاتۋلاسىپ, بٸرگە ٶمٸر سٷرە باستاعان. 2024 جىلى اقبايان بەسٸنشٸ بالاسىنا جٷكتٸ بولعان.
سول جىلدىڭ تامىز ايىندا جانگەلدين اۋىلىنا بارعان كەزدە اقباياننىڭ دەنساۋلىعى كٷرت ناشارلاعان. دەرٸگەرلەر وعان پنەۆموتوراكس دياگنوزىن قويعان. وتا جاسالعاننان كەيٸن ول شامامەن 20 كٷن كومادا جاتقان.
تەرگەۋ ماتەريالدارىندا وسى جاعدايدان سوڭ اقباياننىڭ پسيحيكالىق دەنساۋلىعىندا قيىندىقتار بايقالعانى ايتىلادى. قازٸر بۇل دەرەكتەر اۋىر قىلمىسقا قاتىستى ٸستٸڭ مەن-جايىن انىقتاۋ بارىسىندا قاراستىرىلىپ جاتىر.
