ءانشى الماس كىشكەنبايەۆتىڭ ءىسى سوتقا ءتۇستى. ارتىسكە قانداي ايىپ تاعىلىپ وتىرعانى بەلگىلى بولدى، دەپ حابارلايدى Dalanews.kz.
كىشكەنبايەۆقا قاتىستى ءىس الماتىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىندا قارالادى.
سوت وتىرىسى بۇگىن، 3 اقپان ساعات 17.20-عا بەلگىلەنگەن.
- سوت وندىرىسىندە كىشكەنبايەۆ الماس بەكسەيىتۇلىنا قاتىستى قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 434-بابىنىڭ 1-بولىگى (“ۇساق بۇزاقىلىق”) بويىنشا اكىمشىلىك قۇقىق بۇزۋشىلىق تۋرالى ءىس قارالۋدا. 2024 جىلعى 31 قاڭتاردا ءىس بويىنشا ءمان-جايلاردى قاراستىرۋ مۇمكىن بولمادى، سەبەبى جابىرلەنۋشى، كامەلەتكە تولماعان ك.-نىڭ زاڭدى وكىلى اۋىزشا ءوتىنىش ءبىلدىرىپ، ءىس ماتەريالدارىمەن تانىسۋ ءۇشىن قاراۋ كۇنىن كەيىنگە قالدىرۋدى سۇرادى، – دەلىنگەن سوت كابينەتىندەگى اقپاراتتا.
بۇعان دەيىن جۋرناليست ميحايل كوزاچكوۆ Telegram كانالىندا 2007 جىلى تۋعان بوزبالانىڭ پوليسياعا شاعىم تۇسىرگەنىن جازعان. ايتۋىنشا، 17 جاسار كۋرەرگە كەشكى ۋاقىتتا ءۇش بوتەلكە سىراعا تاپسىرىس بەرىلگەن. تاۋاردى جەتكىزگەن سوڭ، شامامەن 40 جاستاعى ەر ادام ءجاسوسپىرىمدى بىرگە ءىشۋدى ۇسىنعان جانە ينتيمدىك تۇرعىدا تيىسكەن دەگەن دەرەك كەلتىرىلگەن.
وقيعاعا بايلانىستى جەتكىنشەكتىڭ اكەسى بىردەن قۇقىق قورعاۋ ورگاندارىنا جۇگىنگەن. كەيىن پوليسيا قىزمەتكەرلەرى ءانشى الماس كىشكەنبايەۆتى بولىمشەگە جەتكىزگەنىن راستادى. تەكسەرۋ بارىسىندا سىراعا تاپسىرىس بەرگەن ادام ءدال وسى كىشكەنبايەۆ ەكەنى انىقتالدى، ءبىراق ونىڭ قىلمىستىق ارەكەتكە بارعانى ءالى دالەلدەنگەن جوق.
الماتى قالالىق پوليسيا دەپارتامەنتى بۇل وقيعاعا وراي رەسمي تۇسىنىكتەمە بەردى:
“اكەسى كامەلەتكە تولماعان ۇلىنا ءتيىسۋ فاكتىسى بويىنشا ارىز جازدى. قازىرگى ۋاقىتتا تەكسەرۋ جۇرگىزىلىپ جاتىر. بارلىق ءمان-جايدى انىقتاۋ ءۇشىن ازامات ك. پوليسياعا جەتكىزىلدى”.
زاڭگەرلەردىڭ پىكىرىنشە، ەگەر كۇدىكتىڭ راستالماعانى انىقتالسا، كىشكەنبايەۆتىڭ ابىرويىن قالپىنا كەلتىرۋ ماسەلەسى ءوز الدىنا بولەك قارالۋى مۇمكىن. ال ەگەر ءجاسوسپىرىمنىڭ ارىزىنداعى دەرەكتەر راس بولسا، ءانشى زاڭ الدىندا جاۋاپ بەرەدى.
الماس كىشكەنبايەۆتىڭ ءوزى ازىرگە ەشقانداي رەسمي مالىمدەمە جاساعان جوق.
ءىستىڭ اق-قاراسىن اجىراتۋ ءۇشىن پروديۋسەر ەرلان اليموۆكە بايلانىسقا شىققان ەدىك. الايدا ول ءۇش اي بۇرىن انشىمەن جۇمىس ىستەۋىن توقتاتقانىن مالىمدەدى.
