Ánshi Almas Kishkenbaevtyń isi sotqa tústi. Ártiske qandai aiyp taǵylyp otyrǵany belgili boldy, dep habarlaidy Dalanews.kz.
Kishkenbaevqa qatysty is Almatynyń ákimshilik quqyq buzýshylyqtar jónindegi mamandandyrylǵan aýdanaralyq sotynda qaralady.
Sot otyrysy búgin, 3 aqpan saǵat 17.20-ǵa belgilengen.
- Sot óndirisinde Kishkenbaev Almas Bekseiitulyna qatysty Qazaqstan Respýblikasynyń Ákimshilik quqyq buzýshylyq týraly kodeksiniń 434-babynyń 1-bóligi (“Usaq buzaqylyq”) boiynsha ákimshilik quqyq buzýshylyq týraly is qaralýda. 2024 jylǵy 31 qańtarda is boiynsha mán-jailardy qarastyrý múmkin bolmady, sebebi jábirlenýshi, kámeletke tolmaǵan K.-nyń zańdy ókili aýyzsha ótinish bildirip, is materialdarymen tanysý úshin qaraý kúnin keiinge qaldyrýdy surady, – delingen sot kabinetindegi aqparatta.
Buǵan deiin jýrnalist Mihail Kozachkov Telegram kanalynda 2007 jyly týǵan bozbalanyń politsiiaǵa shaǵym túsirgenin jazǵan. Aitýynsha, 17 jasar kýrerge keshki ýaqytta úsh bótelke syraǵa tapsyrys berilgen. Taýardy jetkizgen soń, shamamen 40 jastaǵy er adam jasóspirimdi birge ishýdi usynǵan jáne intimdik turǵyda tiisken degen derek keltirilgen.
Oqiǵaǵa bailanysty jetkinshektiń ákesi birden quqyq qorǵaý organdaryna júgingen. Keiin politsiia qyzmetkerleri ánshi Almas Kishkenbaevty bólimshege jetkizgenin rastady. Tekserý barysynda syraǵa tapsyrys bergen adam dál osy Kishkenbaev ekeni anyqtaldy, biraq onyń qylmystyq áreketke barǵany áli dáleldengen joq.
Almaty qalalyq politsiia departamenti bul oqiǵaǵa orai resmi túsinikteme berdi:
“Ákesi kámeletke tolmaǵan ulyna tiisý faktisi boiynsha aryz jazdy. Qazirgi ýaqytta tekserý júrgizilip jatyr. Barlyq mán-jaidy anyqtaý úshin azamat K. politsiiaǵa jetkizildi”.
Zańgerlerdiń pikirinshe, eger kúdiktiń rastalmaǵany anyqtalsa, Kishkenbaevtyń abyroiyn qalpyna keltirý máselesi óz aldyna bólek qaralýy múmkin. Al eger jasóspirimniń aryzyndaǵy derekter ras bolsa, ánshi zań aldynda jaýap beredi.
Almas Kishkenbaevtyń ózi ázirge eshqandai resmi málimdeme jasaǵan joq.
Istiń aq-qarasyn ajyratý úshin prodiýser Erlan Alimovke bailanysqa shyqqan edik. Alaida ol úsh ai buryn ánshimen jumys isteýin toqtatqanyn málimdedi.
