DALA INSIDE تەلەگرام ارناسى وسى تاقىرىپقا تەرەڭىرەك ۇڭىلۋگە تىرىسىپتى.
سوعىسقا دەيىن انگلياداعى "ماۋسىمدىق جۇمىستى" نەگىزىنەن ۋكراينانىڭ قىز-كەلىنشەكتەرى مەن ەر-ازاماتتارى اتقارعان ەكەن.
ماسەلەن: 2021 جىلى 19 مىڭ ۋكراين ازاماتى وسى ۆيزانىڭ مۇمكىندىگىن پايدالانىپ، اعىلشىن فەرمەرلەرىنىڭ باۋ-باقشاسىن قورىعان.
پۋتين شاپقىنشىلىعى ۋكراين حالقىن قولىنا قارۋ الۋعا ءماجبۇر ەتتى. سالدارىنان جازعىتۇرىم انگلياعا اعىلاتىن جۇمىسشىلاردىڭ سانى دا ايتارلىقتاي ازايعان.
بىلتىر Seasonal worker ۆيزاسى ارقىلى 7300 ۋكراين ازاماتى "قارعا قۋۋعا" كەلگەن. بۇل ادام كۇشىنە مۇقتاج انگليانىڭ فەرمەرلەرى ءۇشىن جەتكىلىكسىز. جەرگىلىكتى تۇرعىندار مۇنداي جۇمىسقا بارا بەرمەيدى. سوعىس تا ۇزاققا سوزىلاتىن سىڭايلى.
ەندى نە ىستەمەك كەرەك؟
تىعىرىقتان شىعۋ ءۇشىن وسى ەلدىڭ اۋىل شارۋاشىلىعى مەن ازىق-تۇلىك قاۋىپسىزدىگىنە جاۋاپتى دەپارتامەنتى (قىسقاشا DEFRA) ورتا ازياعا مويىن بۇرادى. ءوز ەلىندەگى جوقشىلىق پەن تارشىلىقتان قاجىعان قازاق، وزبەك، قىرعىز انگلياعا اعىلادى.
DALA INSIDE وسى ەلدىڭ ؟؟ ىشكى ىستەر مينيسترلىگىنىڭ مالىمەتتەر بازاسىنا ءۇڭىلىپ، اعىلشىن جەرىندە قانشا قازاق جۇرگەنىن انىقتاۋعا تىرىستى. ەڭبەگىمىز ەش كەتكەن جوق.
تاپ ءقازىر اعىلشىن ەلىندە 2672 قازاق ءجۇر. بىلتىرعى Seasonal worker ۆيزاسىنان وسىنشا جولداما بۇيىرعان. قىرعىزداردىڭ سانى بىزدەن ەكى ەسە كوپ (4341 ادام). وزبەكتەر دە از ەمەس (4233 ادام). تاجىكتەر دە 4 مىڭعا جەتەقابىل (3894).
وتكەن جىلعى «seasonal worker-دەن» بەرىلگەن 34 500 ۆيزانىڭ 44 پايىزىن ورتا ازيادان كەلگەن جۇمىسشىلار «يەمدەنىپ» كەتكەن. انگليانى «ستاننان» كەلگەن جۇمىس كۇشى جاۋلاپ الدى دەۋگە نەگىز بار.
DALA INSIDE-تىڭ پايىمداۋىنشا بۇل ءۇردىس كرەملدىڭ ورتا ازياداعى ىقپالىن السىرەتەدى. وزبەك پەن قىرعىز، تاجىك ميگرانتتارى ءۇشىن رەسەي نارىعىنىڭ تارتىمدىلىعى تومەندەيدى. ولار باتىستىڭ قۇندىلىقتارىن بويىنا ءسىڭىرىپ ورالادى...
ورىستار شە؟ ولار وزىنەن كورسىن. «Seasonal worker» ۆيزاسىنىڭ ءدامىن تاتىپ، قىزىعىنا كىرە باستاعان شاقتا (2021 جىلى 2200 رەسەيلىككە جولداما بەرىلگەن) پۋتين شاتاق شىعاردى. بريتانيا اگرەسسور ەلدىڭ ازاماتتارىنا بەرىلەتىن جولداما سانىن كۇرت قىسقارتىپ، جۇمىس ىزدەپ كەلگەن جۇزدەگەن ورىستى كەلگەن ىزىمەن كەرى قايتارعان. بىلتىر بۇل ۆيزاعا بار بولعانى 500 رەسەيلىكتىڭ ءولدىم-تالدىم دەگەندە قول جەتكەن.
ال شەتەلگە كەتكىسى كەلەتىن قازاقتار مىنا مۇمكىندىكتى ءمۇلت جىبەرمەۋى ءتيىس:
كەلەر جىلى Seasonal worker ۆيزاسى ارقىلى بەرىلەتىن جولداما سانى ۇلعايادى. بۇل ءۇشىن پرەمەر ريشي سۋناكقا ارنايى العىس ايتۋ كەرەكپىز. جونسون ۇكىمەتى ماۋسىمدىق جۇمىستىڭ ەرەجەسىن قايتا قاراپ، كۆوتا سانىن قىسقارتپاق بولعان. ونىڭ ورنىن باسقان سۋناق (قۇداي تىلەۋىڭدى بەرسىن) كەرىسىنشە كۆوتا سانىن كوبەيتۋگە شەشىم قابىلدادى.
بيىلدىققا بەرىلگەن جولداما سانى 45 مىڭ ۆيزا. الداعى جىلى دا وسى كولەمدەگى كۆوتا بەرىلەدى. قاجەت بولعان جاعدايدا سۋناك ۇكىمەتى جولداما سانىن تاعى 10 مىڭعا ۇلعايتادى. بۇل تەك باۋ-باقشامەن بايلانىستى ۆيزا، بۇعان قوسا قۇس شارۋاشىلىعىنان حابارى بار قازاقتارعا ارناپ قوسىمشا 2 مىڭ جولداما بولىنگەن.
اعىلشىن فەرمەرلەرىنە جالدانىپ، ءتاۋىر تابىس تابۋعا مۇمكىندىك بەرەتىن جولدامانى انگليانىڭ ىشكى ىستەر مينيسترلىگى تاراتادى. كوشى-قون كريتەريىمەن وسى تۇستان تانىسا الاسىز.
Seasonal worker ۆيزاسى اتى ايتىپ تۇرعانداي ماۋسىمدىق جولداما. بريتانيادا تۇرۋ ۋاقىتىڭىز شەكتەۋلى (6 اي)، پرەمەر سۋناكتان جەڭىلدىك تالاپ ەتىپ، پيكەت وتكىزە المايسىز، وتباسىڭىزدى اكەلۋگە دە رۇقسات ەتىلمەيدى.
ماۋسىمدىق جۇمىسشىلاردىڭ قاعاز-قۇجاتىن راسىمدەيتىن رەسمي تىركەلگەن 6 وپەراتور بار. بۇلار:
• AGRI-HR
• Concordia
• ethero (trading as TELPASC)
• Fruitful Jobs
• HOPS Labour Solutions
• Pro-Force
اعىلشىندار ماۋسىمدىق جۇمىسشىلاردى وسىلار ارقىلى جالدايدى. بريتاندار بىزدەي ەمەس، ۆيزا راسىمدەۋمەن اينالىساتىن كومپانيالارعا قاتاڭ تالاپ قويعان.
جالعاسىن وسى تۇستان وقۋىڭىزعا بولادى: https://t.me/dalainside/1427
سۋرەت: ازاتتىق رۋحى سايتىنان
