DALA INSIDE telegram arnasy osy taqyrypqa tereńirek úńilýge tyrysypty.
Soǵysqa deiin Angliiadaǵy "maýsymdyq jumysty" negizinen Ýkrainanyń qyz-kelinshekteri men er-azamattary atqarǵan eken.
Máselen: 2021 jyly 19 myń ýkrain azamaty osy vizanyń múmkindigin paidalanyp, aǵylshyn fermerleriniń baý-baqshasyn qoryǵan.
Pýtin shapqynshylyǵy ýkrain halqyn qolyna qarý alýǵa májbúr etti. Saldarynan jazǵyturym Angliiaǵa aǵylatyn jumysshylardyń sany da aitarlyqtai azaiǵan.
Byltyr Seasonal worker vizasy arqyly 7300 ýkrain azamaty "qarǵa qýýǵa" kelgen. Bul adam kúshine muqtaj Angliianyń fermerleri úshin jetkiliksiz. Jergilikti turǵyndar mundai jumysqa bara bermeidi. Soǵys ta uzaqqa sozylatyn syńaily.
Endi ne istemek kerek?
Tyǵyryqtan shyǵý úshin osy eldiń aýyl sharýashylyǵy men azyq-túlik qaýipsizdigine jaýapty departamenti (qysqasha DEFRA) Orta Aziiaǵa moiyn burady. Óz elindegi joqshylyq pen tarshylyqtan qajyǵan qazaq, ózbek, qyrǵyz Angliiaǵa aǵylady.
DALA INSIDE osy eldiń ?? Ishki ister ministrliginiń málimetter bazasyna úńilip, aǵylshyn jerinde qansha qazaq júrgenin anyqtaýǵa tyrysty. Eńbegimiz esh ketken joq.
Tap qazir aǵylshyn elinde 2672 qazaq júr. Byltyrǵy Seasonal worker vizasynan osynsha joldama buiyrǵan. Qyrǵyzdardyń sany bizden eki ese kóp (4341 adam). Ózbekter de az emes (4233 adam). Tájikter de 4 myńǵa jeteqabyl (3894).
Ótken jylǵy «seasonal worker-den» berilgen 34 500 vizanyń 44 paiyzyn Orta Aziiadan kelgen jumysshylar «iemdenip» ketken. Angliiany «stannan» kelgen jumys kúshi jaýlap aldy deýge negiz bar.
DALA INSIDE-tyń paiymdaýynsha bul úrdis Kremldiń Orta Aziiadaǵy yqpalyn álsiretedi. Ózbek pen qyrǵyz, tájik migranttary úshin Resei naryǵynyń tartymdylyǵy tómendeidi. Olar Batystyń qundylyqtaryn boiyna sińirip oralady...
Orystar she? Olar ózinen kórsin. «Seasonal worker» vizasynyń dámin tatyp, qyzyǵyna kire bastaǵan shaqta (2021 jyly 2200 reseilikke joldama berilgen) Pýtin shataq shyǵardy. Britaniia agressor eldiń azamattaryna beriletin joldama sanyn kúrt qysqartyp, jumys izdep kelgen júzdegen orysty kelgen izimen keri qaitarǵan. Byltyr bul vizaǵa bar bolǵany 500 reseiliktiń óldim-taldym degende qol jetken.
Al shetelge ketkisi keletin qazaqtar myna múmkindikti múlt jibermeýi tiis:
Keler jyly Seasonal worker vizasy arqyly beriletin joldama sany ulǵaiady. Bul úshin premer Rishi Sýnakqa arnaiy alǵys aitý kerekpiz. Jonson úkimeti maýsymdyq jumystyń erejesin qaita qarap, kvota sanyn qysqartpaq bolǵan. Onyń ornyn basqan Sýnaq (qudai tileýińdi bersin) kerisinshe kvota sanyn kóbeitýge sheshim qabyldady.
Biyldyqqa berilgen joldama sany 45 myń viza. Aldaǵy jyly da osy kólemdegi kvota beriledi. Qajet bolǵan jaǵdaida Sýnak úkimeti joldama sanyn taǵy 10 myńǵa ulǵaitady. Bul tek baý-baqshamen bailanysty viza, buǵan qosa qus sharýashylyǵynan habary bar qazaqtarǵa arnap qosymsha 2 myń joldama bólingen.
Aǵylshyn fermerlerine jaldanyp, táýir tabys tabýǵa múmkindik beretin joldamany Angliianyń Ishki ister ministrligi taratady. Kóshi-qon kriteriimen osy tustan tanysa alasyz.
Seasonal worker vizasy aty aityp turǵandai maýsymdyq joldama. Britaniiada turý ýaqytyńyz shekteýli (6 ai), premer Sýnaktan jeńildik talap etip, piket ótkize almaisyz, otbasyńyzdy ákelýge de ruqsat etilmeidi.
Maýsymdyq jumysshylardyń qaǵaz-qujatyn rásimdeitin resmi tirkelgen 6 operator bar. Bular:
• AGRI-HR
• Concordia
• ethero (trading as TELPASC)
• Fruitful Jobs
• HOPS Labour Solutions
• Pro-Force
Aǵylshyndar maýsymdyq jumysshylardy osylar arqyly jaldaidy. Britandar bizdei emes, viza rásimdeýmen ainalysatyn kompaniialarǵa qatań talap qoiǵan.
Jalǵasyn osy tustan oqýyńyzǵa bolady: https://t.me/dalainside/1427
Sýret: Azattyq rýhy saitynan
