ول اۋعانستانداعى جاعداي ۋشىعا تۇسسە، ورتا ازيا ەلدەرى رەسەيگە ءوز ەركىمەن قوسىلادى دەپ ەسەپتەيدى. جيرينوۆسكييدىڭ بۇلاي دەگەن پىكىرى پارتيانىڭ Youtub-تەگى رەسمي ارناسىندا جاريالانعان.
“اۋعانستان حالقىنىڭ نەگىزگى بولىگى پۋشتۋنداردان تۇرادى. ولار پاكىستاننىڭ حالقىنا جاقىن، ولار دا وزدەرىن پۋشتۋنعا جاتقىزادى. بۇلار بىرىگە كەلە، قازىرگى اۋعانستان اۋماعىندا پۋشتۋنيستان اتتى يسلام مەملەكەتى قۇرىلادى. ولار بۇل ويىن جۇزەگە اسىرۋدى ارماندايدى، ولارعا كەدەرگى كەلتىرمەڭىزدەر. ينديا مەن ءبىزدىڭ ورتا ازيانىڭ اراسىندا ءبىر پۋشتۋنيستان بولۋى قاجەت…”، – دەيدى رەسەيلىك ساياساتكەر.
جيرينوۆسكيي رەسەي ءۇشىن مۇنداي جاعدايدا ەش ارەكەت ەتپەۋ ەڭ دۇرىس قادام دەپ پايىمدايدى.
“ەگەر كرەمل اۋعانستانداعى جاعدايعا ارالاسپاي، شەت قالار بولسا، ءتۇرلى-تۇرلى تەرروريستىك ۇيىمداردىڭ وكىلدەرى، باندىلارى ورتا ازياعا باسىپ كىرەدى. ولار اۋعانستاننان اشتىق، جوقشىلىق پەن جۇمىسسىزدىقتان قاشىپ اتالعان ايماقتى تورۋىلدايدى.
ورتا ازيادا قازاقستان، وزبەكستان، تۇرىكمەنستان سەكىلدى اۋقاتتى ەلدەر بار. ولار ايماققا باسىپ كىرىپ، باسىپ-جانشىپ، قىرىپ-جويا باستايدى. ءبىز سوندا دا ارالاسپاۋىمىز قاجەت. شامالى ۋاقىتتان كەيىن بۇل ەلدەردىڭ جەتەكشىلەرى ماسكەۋ نە بولماسا ساراتوۆقا باس ساۋعالاپ، قاشىپ كەلەدى. سودان سوڭ پرەزيدەنت پۋتينگە وزدەرى باسشىلىق ەتكەن مەملەكەتتى رەسەيدىڭ ءبىر گۋبەرنياسى رەتىندە قۇرامىنا قوسىپ الۋدى وتىنەدى. مىنە، سول كەزدە ءبىز بۇل ۇسىنىستى قابىل الامىز، ورتا ازيا تەرروريستەردەن، ەكسترەميستەردەن اراشالاپ، ايماقتى راديكالداردان تازالايمىز”، – دەيدى ليبەرال-دەموكراتيالىق پارتياسىنىڭ ءتوراعاسى.
جيرينوۆسكييدىڭ پىكىرىنشە، بۇل جوسپاردىڭ اقىرعى ايالداماسى – ورتا ازيا ەلدەرىنىڭ رەسەيدىڭ قۇرامىنا قوسىلۋىمەن اياقتالادى. ايماقتا كرەملدىڭ بۇيرىعىنا باعىناتىن بىشكەك، تاشكەنت، دۋشانبە، اشحاباد جانە شىمكەنت گۋبەرنيالارى قۇرىلادى.
“ەشقانداي رەسپۋبليكا، ەشقانداي پرەزيدەنت دەگەن بولمايدى. ءبىز بۇعان جول بەرمەيمىز”، – دەيدى ساياساتكەر.
