مەرەكەلىك شارا كونستيتۋسيانىڭ قالىپتاسۋ تاريحى تۋرالى پرولوگپەن اشىلدى. مۇنان سوڭ وبلىس اكىمى اماندىق باتالوۆ جينالعانداردى مەرەكەمەن قۇتتىقتادى.
– ەلدىڭ باستى قۇجاتى، كيەلى كىتابى سانالاتىن كونستيتۋسيا ءار ازاماتقا ءوزىن جەكە تۇلعا رەتىندە دامىتۋعا، ەركىن ءبىلىم الۋعا، قالاۋىنشا ەڭبەك ەتۋگە، كاسىپپەن اينالىسۋعا، رۋحاني جانە ماتەريالدىق يگىلىكتەرگە قول جەتكىزۋگە مۇمكىندىك بەرىپ وتىر. سوندىقتان دا ىستىق مەكەن، جىلى ۇيا، ورتاق وتانىمىز قازاقستاندا ءومىر ءسۇرۋ – ءبىز ءۇشىن زور ماقتانىش! كونستيتۋسيامىزدىڭ «ءبىز، قازاقستان حالقى» دەپ باستالۋىنىڭ ءوزى مەملەكەتىمىزدە ەل بىرلىگىنىڭ، حالىقتار دوستىعىنىڭ نەگىزگى قۇندىلىق ەكەنىن ايعاقتايدى. باستى زاڭىمىز بارشامىزدى تاتۋلىققا، ەلجاندىلىققا، بىر-بىرىمىزگە قۇرمەتپەن قاراۋعا شاقىرادى. تاۋەلسىزدىكتىڭ 30 جىلعا جۋىق تاريحى اتا زاڭىمىز ايقىنداعان وسى باعىتىمىزدىڭ دۇرىس ەكەنىن كورسەتىپ وتىر. بۇگىندە قازاقستان بەدەلدى، وركەندەۋ جولىنا تۇسكەن، تاريحى، ءتىلى، مادەنيەتى قالىپتاسقان، الەم كارتاسىنان بەرىك ورىن العان مەملەكەتكە اينالدى. سول جەتكەن جەتىستىكتەرىمىزدى، ەلباسى سالىپ بەرگەن سارا جولدى جالعاستىرۋعا، ستراتەگياسىن ودان ءارى نىعايتۋعا پرەزيدەنتىمىز قاسىم-جومارت كەمەل ۇلى توقايەۆ ءبارىمىزدى جۇمىلدىرىپ وتىر. وسى ورتاق ىسكە اتسالىسىپ، بەلسەنە ۇلەس قوسۋ – باستى مىندەتىمىز، – دەپ اتاپ وتكەن ا.باتالوۆ وبلىستىڭ دامۋ جاعدايى جايىندا قىسقاشا ايتىپ بەردى.
وبلىس اكىمىنىڭ ايتۋىنشا، بيىلعى جىلدىڭ قاڭتار، شىلدە ايلارىندا ەكونوميكانىڭ بارلىق نەگىزگى سالالارىندا ءوسىم بار. ونەركاسىپتە 502،2 ملرد تەڭگەنىڭ ءونىمى ءوندىرىلىپ، ناقتى كولەم يندەكسى 102،1% قۇرادى. اۋىل شارۋاشىلىعىندا جالپى ءونىم 231،7 ملرد تەڭگەگە جەتىپ، 2،2% ءوسىم قامتاماسىز ەتىلدى. 263،1 ملرد تەڭگە ينۆەستيسيا تارتىلىپ، 23 مىڭداي جۇمىس ورنى قۇرىلعان.
ماسەلەن، Nur Otan پارتياسىنىڭ XVIII سەزىندە بەرىلگەن تاپسىرمالاردى ورىنداۋ ماقساتىندا رەسپۋبليكالىق بيۋدجەتتەن كوپبالالى وتباسىلاردى تۇرعىن ۇيمەن قامتاماسىز ەتۋگە قوسىمشا 5،6 ملرد تەڭگە ءبولىندى، سونىڭ 2،2 ملرد تەڭگەسى 180 پاتەرلىك 8 تۇرعىن ءۇي سالۋعا، سول سياقتى 3،4 ملرد تەڭگەسى 492 پاتەر ساتىپ الىپ بەرۋگە باعىتتالادى. قابىلدانعان شارالاردىڭ ارقاسىندا بيىلعى جىلى وبلىس بويىنشا 672 كوپبالالى وتباسى كوپتەن كۇتكەن باسپانالارىنا قول جەتكىزەدى. جالپى، «نۇرلى جەر» باعدارلاماسىنىڭ شەڭبەرىندە الەۋمەتتىك ءالجۋاز توپتاردى جالگەرلىك تۇرعىن ۇيمەن قامتاماسىز ەتۋ ءۇشىن بيۋدجەتتەن 8،7 ملرد تەڭگە ءبولىندى. 708 پاتەرلىك 284 تۇرعىن ءۇي پايدالانۋعا بەرىلەدى دەپ جوسپارلانعان. وسى جەتىستىكتەردىڭ بارلىعىنا دا نەگىزى زاڭىمىزدىڭ تالاپتارى مەن ەرەجەلەرىن باسشىلىققا الۋدىڭ ناتيجەسىندە قول جەتكىزىلدى. بارشاڭىزدى كونستيتۋسيا كۇنىمەن قۇتتىقتاي وتىرىپ، مىقتى دەنساۋلىق، ەسەلى ەڭبەك، تولايىم تابىس، ءار وتباسىنا باق-بەرەكە تىلەيمىن! – دەگەن ا.باتالوۆ، سالتاناتتى بۇدان ءارى ماراپاتتاۋ راسىمىمەن جالعاستىرىپ، ءبىرقاتار مەملەكەتتىك، سوت جانە جەرگىلىكتى اتقارۋشى ورگاندار قىزمەتكەرلەرىنە وبلىس اكىمىنىڭ قۇرمەت گراموتاسى مەن العىس حاتىن تابىستادى. سونىمەن بىرگە سايلاۋ زاڭناماسىنىڭ كونستيتۋسيالىق نەگىزدەرىن بىلۋگە ارنالعان جاس مەملەكەتتىك قىزمەتشىلەر اراسىنداعى اكسيانىڭ جەڭىمپازى مەرجان تولەگەنوۆكە ق ر ورتالىق سايلاۋ كوميسسياسىنىڭ ديپلومى بەرىلدى.
سول سياقتى مەملەكەتتىك قىزمەتكە جاقىندا قابىلدانعان بەس جاس مامان انت بەردى. جاس قىزمەتشىلەر ەلىمىزدىڭ كونستيتۋسياسىن، زاڭدارىن ساقتاۋعا، قازاقستان حالقىنا ىنتامەن، كاسىبي، ادال قىزمەت ەتۋگە، مەملەكەت مۇددەسىن قورعاۋعا، حالىقتىڭ يگىلىگىنە قىزمەت ەتە وتىرىپ، قازاقستان رەسپۋبليكاسى پرەزيدەنتىنىڭ ساياساتىن جۇرگىزۋگە ءسوز بەردى.
جاس مامانداردى قۇتتىقتاعان اماندىق باتالوۆ، جاۋاپكەرشىلىكتى سەزىنە وتىرىپ، حالىققا ادال قىزمەت ەتكەندە عانا جەتىستىككە جەتۋگە بولاتىنىن تىلگە تيەك ەتىپ، مەملەكەتتىك قىزمەتتەگى ەڭبەكتەرىندە ابىرويلى بولۋلارىنا تىلەكتەستىك ءبىلدىردى.
الماتى وبلىسى اكىمىنىڭ باسپا ءسوز قىزمەتى
