ءسانى مەن سالتاناتى جاراسقان ساحنادا ءسوز العان قالا اكىمى ءابدىباقىت ماقۇلبايەۆ العاش رەت 1999 جىلى باستاۋ الىپ، كەيىننەن توقتاپ قالعان بايقاۋ «بولاشاققا باعدار: رۋحاني جاڭعىرۋ» باعدارلاماسى اياسىندا قايتا جاڭعىرىپ وتىرعاندىعىن جەتكىزدى. ايگىلى كومپوزيتور، قازاقستانعا ەڭبەك سىڭىرگەن ونەر قايراتكەرى س.بايتەرەكوۆتىڭ ءومىرى مەن ونەر جولىنا ارنايى توقتالىپ، بايقاۋعا قاتىسۋشىلارعا ساتتىلىك تىلەدى.
جالپى بايقاۋعا وبلىس اۋماعىنان 16 جاس ورىنداۋشى قاتىسىپ، كومپوزيتوردىڭ اندەرىن ورىندادى.
ءانشى، كومپوزيتور، ق ر ەڭبەك سىڭىرگەن ءارتىسى مارات وماروۆ ءتوراعالىق ەتكەن ءادىل قازىلار القاسىنىڭ قۇرامىندا ق ر حالىق ءارتىسى، پروفەسسور قاجىبەك بەكبوسىنوۆ، س.بايتەرەكوۆتىڭ جۇبايى ءلاززات احانوۆا، كومپوزيتور بەكجىگىت سەردالى، س.بايتەرەكوۆ اتىنداعى حالىقارالىق «ءاليا» فەستيۆالىنىڭ 1999 جىلعى گران-پري جۇلدەگەرى ماقسات ايتجانوۆ جانە س.بايتەرەكوۆ اتىنداعى مۋزىكا مەكتەبىنىڭ ديرەكتورى امانبەك تۇرسىنبەكوۆ بولدى.
قورىتىندىسىندا سوزاق اۋدانىنان كەلگەن تالعات سوزاقباي باس جۇلدەنى جەڭىپ الدى. ءبىرىنشى ورىن جەرلەسىمىز بالىمشا سابىرعا بۇيىرسا، كەلەس اۋدانىنان كەلگەن بەكسۇلتان وتاربەكوۆ ەكىنشى ورىندى يەلەندى. ءۇشىنشى ورىندى ارىستىق سەيىلحان ەردوس پەن تولەبيلىك جانيا تولەپبەرگەن ءوزارا ءبولىستى.
بۇدان بولەك بايدىبەكتەن كەلگەن قۋات قاسەنوۆ «ساحنا شەبەرى»، وتىرارلىق ۇلجالعاس ءابىلداحان «ەڭ جاس ورىنداۋشى»، قازىعۇرتتىق نۇربەك قوجاتوۆ «كورەرمەن كوزايىمى» نوميناسيالارىن جەڭىپ الدى.
