جەلىگە تاراپ، جالپاق جۇرتتىڭ جاعاسىن ۇستاتقان بەينەجازبانى 14 ماۋسىم كۇنى "التىن وردا" بازارىنداعى كۋاگەرلەر ءتۇسىرىپ العان. وندا اعاتايلاپ جالىنعان جىگىت 2 رەت اۋىر سوققى العانى انىق كورىنەدى. ءبىراق ول كەزدە قاينار 500 مىڭنىڭ تەلەفونى ءۇشىن باقيلىق بولامىن دەپ ويلاماعان دا ەدى.
"كومەكتەسەتىندەي ەشكىم ەشتەڭە تۇسىنبەي قالدى. "اعاتاي، تەلەفونىمدى بەر" دەپ جالىنىپ جاتىر. ونىڭ قولىندا پىشاق بولدى عوي. قىزدار كومەكتەستى"، – دەدى كۋاگەر.
باسىنا تيگەن اۋىر سوققىدان اۋرۋحانادا كوز جۇمعان جاس جىگىتتى جاقىندارى 11 شىلدەدە اقتىق ساپارعا اتتاندىردى. تۋىستارى كىسى ولىمىنە سەبەپكەر بولعان كۇدىكتىگە قاتاڭ جازا قولدانۋدى تالاپ ەتىپ وتىر.
"مۇندا بەلگىلى جۇيە بار سەكىلدى. الدىمەن كۇيەۋىمە بالالى ايەل كەلىپ، تەلەفوندى قايدا ساتۋعا بولاتىنىن ايتقان. قاينار سول كەزدە-اق ءبىر شيكىلىكتى سەزگەنىن ايتتى، ءبىراق تەلەفونىن ساتپاق بولعان. “التىن وردادا" كۇتكەن. ەكى جىگىت كەلىپ، كورەمىن دەپ ۇيالى تەلەفونىن العان. بەرمەي، ۇرعان عوي"، – دەدى مارقۇمنىڭ جارى شىنار داۋلەت قىزى.
قاسكويدىڭ قولىنان قازا بولعان قايناردىڭ قارا شاڭىراعى قاڭىراپ تۇر. ونىڭ ارتىندا اناسى مەن جارى قالدى. مارقۇمنىڭ اناسى 6 كۇن بويى اۋرۋحانادا جاتقان ۇلىنا دەر كەزىندە دۇرىس ەم جاسالعاندا ءتىرى قالار ەدى دەيدى. ول "باسىنداعى ۇيىعان قاندى و باستا الىپ تاستاۋعا بولاتىن ەدى عوي" دەپ قىنجىلادى.
"تالعاردىڭ دارىگەرلەرىنە ايتار شاعىمىم بار. بالامدى دۇرىس قارامادى. ەسىكتىڭ الدىنداعى ءيتىڭدى دە سىلاپ-سيپايسىڭدار عوي، سوندا بالام يت قۇرلى بولمادى ما؟ ابدەن بەس-التى كۇن بولعاننان كەيىن وزگە دارىگەرگە جىبەرگەن. قالاعا الىپ بارۋ ءۇشىن جەدەل جاردەم كولىگىن دە ۇسىنبادى. تەك اۋرۋدى باساتىن ءدارى سالا بەردى، ءبىراق وتا تاعايىندامادى"، – دەدى مارقۇمنىڭ اناسى پاتىگۇل مۇزارتبەك قىزى.
اسىراۋشىسىنان ايرىلعان انانىڭ ارىزىن ەستىگەن اق حالاتتىلار 6 كۇندە جاعدايى قاناعاتتانارلىق بولعان سوڭ، وبلىستىق اۋرۋحاناعا جونەلتۋدى ءجون سانادىق دەگەن جاۋاپ بەردى.
"كەلگەن كەزدە جاعدايى ورتاشا اۋىر بولدى. سول جاق بەت سۇيەكتەرىنىڭ سىنۋى دياگنوزىمەن جاتقىزىلعان. 14 ماۋسىمنان 20 ماۋسىمعا دەيىن 6 كۇن وسىندا تراۆماتولوگيادا جاتىپ، جاعدايى قاناعاتتانارلىق بولعاسىن كەلىسىلىپ، وبلىستىق اۋرۋحانادا وتا جاساۋعا اۋىستىرىلعان"، – دەدى تالعار اۋداندىق ورتالىق اۋرۋحاناسى باس دارىگەرىنىڭ ەمدەۋ ءىسى بويىنشا ورىنباسارى باقىت جامەكوۆ.
باقىت جامەكوۆتىڭ ايتۋىنشا، تالعارداعى اۋرۋحانادا وتا جاساۋعا سەبەپ بولماعان.
"وتا جاساۋعا سول كەزدە كورسەتكىش بولعان جوق. بىرىنشىدەن، مەن ونداي ەشقانداي پىكىر بەرە المايمىن. ونى بىزگە بەرەتىن قۇزىرلى ورگاندار بار، سوت-مەديسينالىق ساراپتاما بار"، – دەپ قوستى باقىت جامەكوۆ.
ال اۋىر سوققىعا جىعىپ ءولتىردى دەپ كۇدىككە ىلىنگەن جامبىل وبلىسىنىڭ 28 جاستاعى ازاماتى قاماۋعا الىندى. الماتى وبلىستىق پوليسيا دەپارتامەنتىنىڭ دەرەگىنشە، ول جەدەل ىزدەستىرۋ جۇمىستارىنىڭ ناتيجەسىندە ۇستالعان. مارقۇمنىڭ وتباسى قۇزىرلى ورگاندار ءىستى ءادىل تەرگەسە ەكەن دەيدى.
ەسكە سالايىق، بۇعان دەيىن الماتى وبلىسىنداعى "التىن وردا" بازارىندا ەر ادام تەلەفونىن قايتارماق بولعان جىگىتتى ۇرىپ تاستاعان ەدى. الايدا العان سوققىلاردان كەيىن جىگىت اۋرۋحاناعا ءتۇسىپ، 8 شىلدەدە جان تاپسىرعان.
https://youtu.be/F0x1mbLwYRk
