Jelige tarap, jalpaq jurttyń jaǵasyn ustatqan beinejazbany 14 maýsym kúni "Altyn orda" bazaryndaǵy kýágerler túsirip alǵan. Onda aǵatailap jalynǵan jigit 2 ret aýyr soqqy alǵany anyq kórinedi. Biraq ol kezde Qainar 500 myńnyń telefony úshin baqilyq bolamyn dep oilamaǵan da edi.
"Kómektesetindei eshkim eshteńe túsinbei qaldy. "Aǵatai, telefonymdy ber" dep jalynyp jatyr. Onyń qolynda pyshaq boldy ǵoi. Qyzdar kómektesti", – dedi kýáger.
Basyna tigen aýyr soqqydan aýrýhanada kóz jumǵan jas jigitti jaqyndary 11 shildede aqtyq saparǵa attandyrdy. Týystary kisi ólimine sebepker bolǵan kúdiktige qatań jaza qoldanýdy talap etip otyr.
"Munda belgili júie bar sekildi. Aldymen kúieýime balaly áiel kelip, telefondy qaida satýǵa bolatynyn aitqan. Qainar sol kezde-aq bir shikilikti sezgenin aitty, biraq telefonyn satpaq bolǵan. “Altyn ordada" kútken. Eki jigit kelip, kóremin dep uialy telefonyn alǵan. Bermei, urǵan ǵoi", – dedi marqumnyń jary Shynar Dáýletqyzy.
Qaskóidiń qolynan qaza bolǵan Qainardyń qara shańyraǵy qańyrap tur. Onyń artynda anasy men jary qaldy. Marqumnyń anasy 6 kún boiy aýrýhanada jatqan ulyna der kezinde durys em jasalǵanda tiri qalar edi deidi. Ol "Basyndaǵy uiyǵan qandy o basta alyp tastaýǵa bolatyn edi ǵoi" dep qynjylady.
"Talǵardyń dárigerlerine aitar shaǵymym bar. Balamdy durys qaramady. Esiktiń aldyndaǵy itińdi de sylap-sipaisyńdar ǵoi, sonda balam it qurly bolmady ma? Ábden bes-alty kún bolǵannan keiin ózge dárigerge jibergen. Qalaǵa alyp barý úshin jedel járdem kóligin de usynbady. Tek aýrýdy basatyn dári sala berdi, biraq ota taǵaiyndamady", – dedi marqumnyń anasy Pátigúl Muzartbekqyzy.
Asyraýshysynan airylǵan ananyń aryzyn estigen aq halattylar 6 kúnde jaǵdaiy qanaǵattanarlyq bolǵan soń, oblystyq aýrýhanaǵa jóneltýdi jón sanadyq degen jaýap berdi.
"Kelgen kezde jaǵdaiy ortasha aýyr boldy. Sol jaq bet súiekteriniń synýy diagnozymen jatqyzylǵan. 14 maýsymnan 20 maýsymǵa deiin 6 kún osynda travmatologiiada jatyp, jaǵdaiy qanaǵattanarlyq bolǵasyn kelisilip, oblystyq aýrýhanada ota jasaýǵa aýystyrylǵan", – dedi Talǵar aýdandyq ortalyq aýrýhanasy bas dárigeriniń emdeý isi boiynsha orynbasary Baqyt Jámekov.
Baqyt Jámekovtyń aitýynsha, Talǵardaǵy aýrýhanada ota jasaýǵa sebep bolmaǵan.
"Ota jasaýǵa sol kezde kórsetkish bolǵan joq. Birinshiden, men ondai eshqandai pikir bere almaimyn. Ony bizge beretin quzyrly organdar bar, sot-meditsinalyq saraptama bar", – dep qosty Baqyt Jámekov.
Al aýyr soqqyǵa jyǵyp óltirdi dep kúdikke ilingen Jambyl oblysynyń 28 jastaǵy azamaty qamaýǵa alyndy. Almaty oblystyq politsiia departamentiniń dereginshe, ol jedel izdestirý jumystarynyń nátijesinde ustalǵan. Marqumnyń otbasy quzyrly organdar isti ádil tergese eken deidi.
Eske salaiyq, buǵan deiin Almaty oblysyndaǵy "Altyn Orda" bazarynda er adam telefonyn qaitarmaq bolǵan jigitti uryp tastaǵan edi. Alaida alǵan soqqylardan keiin jigit aýrýhanaǵa túsip, 8 shildede jan tapsyrǵan.
https://youtu.be/F0x1mbLwYRk
