شارا بارىسىندا مينيسترگە ريددەر قالاسىنىڭ دەندروساياباعىنا قاتىستى سۇراق قويىلدى. ەسكە سالايىق، دەدروپارك اۋماعىندا مەكتەپ سالۋ جوسپارلانعان. تۇرعىندار ءبىلىم وشاعىن باسقا جەردەن سالۋدى ءوتىندى.
– مەنىڭ ويىمشا، بۇل ساياباقتى ءالى دە ساقتاۋ كەرەك. جاڭا اعاشتاردى وتىرعىزۋعا جىلدار قاجەت. مەن اكىمدىكتەن باس جوسپاردى قايتا قاراپ، جۇرتشىلىق پەن حالىقتىڭ پىكىرىن ەسكەرە وتىرىپ، پىسىقتاۋدى سۇرار ەدىم، – دەدى ءزۇلفيا سۇلەيمەنوۆا.
ءبىراق مەكتەپ سالىپ، اۋماقتى اباتتاندىرۋ تۋرالى ۇسىنىستى قولداعاندار دا بولدى. ءوز كەزەگىندە ريددەر قالاسى اكىمىنىڭ مىندەتىن اتقارۋشى دارحان قوسانتايەۆ بولاشاق قۇرىلىس الاڭىنىڭ اۋماعىندا ءوسىپ تۇرعان اعاشتاردىڭ جويىلمايتىنىن، تەك جاقىن ماڭعا وتىرعىزىلاتىنىن اتاپ ءوتتى.
سونداي-اق جيىن بارىسىندا وبلىس تۇرعىنى زاڭنامالىق تۇرعىدا وكسيتەحنولوگيا ارقىلى جاسالعان پاكەتتەردى وندىرۋگە جانە ساتۋعا تىيىم سالۋعا ۇسىنىس جاسادى.
مينيستر بۇل ۇسىنىستى قارايتىنىن ايتىپ، ءقازىر بۇل باعىتتا بارلىق جۇمىستار جۇرگىزىلىپ جاتقانىن جەتكىزدى.
سونىمەن قاتار، شارا بارىسىندا كۇرشىم اۋدانىنداعى التىن ءوندىرۋ فابريكاسىنا قاتىستى ساۋالدار قويىلدى. مارالدى اۋىلىنىڭ تۇرعىندارى اۋىلدا التىن وندىرەتىن زاۋىت سالۋعا قارسى ەكەنىن بىلدىرۋدە.
– ءبىزدىڭ بىلۋىمىزشە، كومپانيا تاجىريبەلىك وندىرىسكە رۇقسات العان. ەكولوگيا مينيسترلىگى رۇقسات بەرمەدى. بىزگە جوبا كورسەتىلگەن كەزدە، بىزدە دە وزەنگە بەلگىلى ءبىر حيميالىق زاتتاردىڭ ءتۇسۋ مۇمكىندىگى تۋرالى سۇراقتار تۋىندادى. ءبىز مۇنىڭ ءبارىن قاراپ شىعىپ، ءوز پىكىرلەرىمىزدى قوستىق. ءبىزدىڭ مينيسترلىك التىن وندىرۋگە ەشقانداي رۇقسات بەرمەگەنىن تاعى دا اتاپ وتكىم كەلەدى، – دەپ ءتۇسىندىردى ق ر ەكولوگيا جانە تابيعي رەسۋرستار ءمينيسترى.
