ەستەرىڭىزدە بولسا، وسى جىلى ناۋرىز ايىنىڭ ورتاسىندا استاناداعى «داۋلەت» سپورت كەشەنىندە كۇرەس تۇرلەرىنەن ازيا ەلدەرى اراسىنداعى ريو وليمپياداسىنىڭ جولدامالارى ساراپقا سالىنعان بولاتىن. سوندا ءالنۇر باستاپ كەلگەن جۇڭگو سپورتشىلارى گرەك-ريم كۇرەسىنەن ريو وليمپياداسىنا 3 جولداما جەڭىپ العان ەدى. وسىدان-اق، قازاق ازاماتىنىڭ جۇڭگو بالۋاندارىنا قانشالىقتى ەڭبەك ءسىڭىرىپ جۇرگەنىن باعامداي بەرۋگە بولادى. ەلوردامىزدا وتكەن ليسەنزيالىق باسەكەدە قازاقستان گرەك-ريم كۇرەسىنەن جالعىز-اق جولداماعا قول جەتكىزدى.
بۇگىن سول جۇڭگو بالۋاندارىن باپتاپ، سپورت الەمىنە ءوز ۇلەسىن قوسىپ جۇرگەن ءالنۇر تورگەۇلىن استاناعا كەلىپ، قىدىرىپ جۇرگەنىن ەستىپ، ارنايى جولىعىپ سۇحباتتاسىپ قايتقان ەدىك. اڭگىمەنىڭ ءالقيسساسىن وليمپيادا ويىندارىنان باستادى.
[caption id="attachment_17432" align="alignright" width="415"]
ءالنۇر تورگە ۇلى[/caption]
- الەم نازارى ريوعا اۋاتىن كۇن جاقىنداپ قالدى. ءبارىمىز دە وسى دودانى اسىعا كۇتىپ ءجۇرمىز. بۇل وليمپيادا دەگەن جاي بىرىنشىلىك ەمەس. تورتكۇل دۇنيەنىڭ تەڭدەسسىز مىقتىلارى باس قوساتىن، جان بەرىپ، جان الىساتىن، ولىسپەي بەرىسپەيتىن، تەك قانا جۇلدە ءۇشىن كۇرەسەتىن دودا. قاي ەلدىڭ سپورتشىسى كوپ مەدال جيناسا، سول ەلدىڭ مەرەيى ارتادى. جۇزدەگەن ەل ءسات سايىن قاي ەل قانشا مەدال الىپ جاتىر سونى ساناپ وتىرادى. بۇرىن اتتارى اتالا بەرمەيتىن ەلدەردىڭ اتتارى وسى وليمپيادا ويىندارى كەزىندە ءجيى اتالادى. جالپى سپورت - ەلدىڭ بەدەلىن ارتتىراتىن، اتىن الەمگە تانىتاتىن ۇلكەن مۇمكىندىك. سوندىقتان ءار ەل ءوزىنىڭ سپورتشىلارىنا اۋىر مىندەت ارتادى.
- بۇگىنگى تاڭدا جۇڭگو سپورتى بۇرىن-سوڭدى بولماعان دەڭگەيدە دامىپ كەتتى. وسىنىڭ قۇپياسىمەن بولىسە وتىرساڭىز...
- ءونىمدى ەڭبەك بار جەردە جەمىستى ناتيجە بولادى. قىتايلار وتە ەڭبەكقور. كۇنىنە 10-15 ساعات جاتتىعۋعا سالساڭ دا توزۋگە بار. وسىنداي ەڭبەكتىڭ ارقاسىندا جۇڭگو سپورتىندا ىلگەرلەۋشىلىك پايدا بولدى. قاي ەل بولسىن ەڭبەكتەنسە، تەر توگىلسە، سونىڭ وتەۋى بولادى. جۇڭگو وليمپيادا ويىندارىنا سپورتتىڭ بارلىق تۇرىنەن قاتىسادى. كوپ جاعدايدا جەڭىل سپورت تۇرلەرىنەن مەدالدار جيادى. ال، قازاقتاردىڭ ۇلتتىق سپورت تۇرلەرىنە اينالىپ كەتكەن بوكس، كۇرەس تۇرلەرىنەن قىتايدىڭ دەڭگەيى وتە ناشار. قحر-دا ءالى بىردە-بىر بالۋان كۇرەس تۇرلەرىنەن وليمپيادا ويىندارىنىڭ جۇلدەسىنە ىلىگە الماي كەلەدى.
- سوڭعى كەزدەرى قىتايدىڭ ۇلتتىق قۇرامالارىنان سول جاقتا تۇراتىن قانداستارىمىزدى ءجيى كەزدەستىرەتىن بولدىق. وسى جىلى ناۋرىزدا استانادا وتكەن كۇرەس تۇرلەرىنەن ازيا ەلدەرى اراسىنداعى ريو وليمپياداسىنىڭ جولدامالارى ساراپقا سالىنعان باسەكەدە ەرلانبەك كاتەي ۇلى دەگەن باۋىرىمىز ەركىن كۇرەستەن ريوعا جولداما جەڭىپ الدى...
- ءيا، ەرلانبەك باۋىرىمىز ءقازىر ءوز سالماعىندا قىتايداعى بالۋاندار اراسىندا ەشكىمگە دەس بەرمەي جۇرگەن ازامات. ول ەركىن كۇرەستە. ال مەن گرەك-ريم كۇرەسىندەمىن. ءبىراق، كوپتەگەن جاتتىعۋلاردا بىرگە بولامىز. بىرگە جۇرەمىز، جاقىن ارالاسامىز. مەنى ءوز اعاسىنداي سىيلايدى. سوندىقتان مەن دە وعان ءوز باۋىرىمداي قارايمىن. قاشاندا تىلەكشى بولامىن. بيىل اللا ءساتىن سالىپ، ءبىرىنشى وليمپياداسىنا بارا جاتىر. وسىدان ءتورت جىل بۇرىن دا لوندونعا جولدامالار ساراپقا سالىنعان تۋرنيردە استانادا اقجۇرەك تاڭاتاروۆ دەگەن بالۋانعا ۇتىلىپ، جولى بولماعان. وسى جولى جاقسى دايىندىقپەن كەلدى. ماقساتى وليمپيادا جولداماسى بولاتىن، دەگەنىنە جەتتى. ەندى ريودا باعى جانسا ەكەن دەپ تىلەيمىن.
- جۇڭگو اتىنان قاتىساتىن ەرلانبەكتەن باسقا قازاق سپورتشىلارىنان كىمدەر بار؟
- ەرلانبەك - قىتايداعى قانداستارىڭىزدان ريوعا بارا جاتقان جالعىز سپورتشى. ءتورت جىلدا ءبىر وتەتىن وليمپيادا ويىندارىنا ءبىر جارىم ميلليارد جۇڭگو اراسىنان ءبىر قازاق بالاسىنىڭ شىعۋى بۇل وڭاي جەتىستىك ەمەس. بۇرىن كسرو كەزىندە قازاق سپورتشىلارى وليمپياداعا قاتىسۋ بىلاي تۇرسىن، ۇلتتىق قۇراماعا ىلىگە المايتىن كەزدەر بولدى عوي. قىتايدا دا تۋرا سول سياقتى. ونداعى از ۇلتتار ءۇشىن قىتايدىڭ ۇلتتىق قۇراماسىنا ىلىگىپ، تالاي سىننان ءوتىپ، سول ەلدىڭ اتىنان وليمپياداعا جولداما ۇتىپ الۋ جەكە سپورتشى ءۇشىن وليمپيادانى ۇتىپ الۋمەن تەڭ دەپ ايتۋعا بولادى.
- ەرلانبەكتەن باسقا قىتايدىڭ ىشكى بىرىنشىلىكتەرىندە توپ جارىپ، وليمپياداعا ىرىكتەۋ سىندارىندا جولى بولماعان باۋىرلارىمىز بولدى ما؟
- قىتايدىڭ ىشكى بىرىنشىلىكتەرىندە جاقسى ونەر كورسەتىپ جۇرگەن قازاق سپورتشىلار جەتكىلىكتى. ءبارىنىڭ ءبىر عانا ارمانى - وليمپياداعا بارۋ. ءبىراق ول ارماننىڭ ءبارى ويلاعانىنداي بولا بەرمەيدى عوي. سول ءۇشىن ءار ءتورت جىل سايىن قىتايدان ءبىر قازاق بالاسى وليمپياداعا بارۋ مۇمكىندىگىنە قول جەتكىزىپ جاتسا، سونىڭ ءوزى ءبىز ءۇشىن ۇلكەن ەرلىك. ءبىراق، 2004 جىلى افينى وليمپياداسىندا جۇڭگو اتىنان ەكى قازاق بالاسى وليمپياداعا باردىق. بولاشاقتا ءبىر ەمەس، ەكى-ۇشتەن اپاراتىن مۇمكىندىكتەر بولادى دەگەن ۇمىتتەمىن. سەبەبى، جاستاردان جاقسى ونەر كورسەتىپ جۇرگەن سپورتشىلار وتە كوپ.
- ەرلانبەك جۇڭگو قازاقتارى اراسىنان وليمپياداعا بارا جاتقان نەشىنشى قازاق بالاسى؟
- ءۇشىنشى قازاق بالاسى. ونداعى قازاقتار وليمپياداعا 2004 جىلى بارا باستادىق. افينى وليمپياداسىندا بوكسشى باۋىرلارىڭىز قانات يسلام ەكەۋمىز بارىپ قاتىستىق. الايدا ەكەۋمىزدىڭ دە جولىمىز بولمادى. ەكەۋمىز دە جارىستى ەرتە اياقتادىق. ءبىراق، مەن قاناتتان بۇرىن كىلەمگە شىقتىم. سول ءۇشىن جۇڭگو قازاقتارى اراسىندا تۇڭعىش وليمپياداعا قاتىسقان قازاق بولىپ قالدىم. 2008 جىلى بەيجىڭ وليمپياداسىنا قانات تاعى قاتىستى. وندا ول قولا جۇلدەنى جەڭىپ العانىن جاقسى بىلەسىزدەر. ال مەن افينىدان كەلگەننەن كەيىن باپكەرلىك جاعىنا اۋىسىپ كەتتىم. لوندوندا ەشكىم بارعان جوق. بيىل قىتايداعى قازاقتار اتىنان ءۇشىنشى قازاق بولىپ ەرلانبەك باۋىرلارىڭىز وليمپيادادا ونەر كورسەتەدى.
- قالاي ويلايسىز، ەرلانبەكتىڭ ريودا مەدال الۋعا مۇمكىندىگى بار ما؟
- ونى ۋاقىت كورسەتەدى. ءقازىر بولجام جاساۋدىڭ قاجەتى جوق. ءبىراق، قانىمىز ءبىر، قايدا جۇرسەك تە قازاقتىڭ ابىرويى ارتىپ، مەرەيى تاسىپ جاتقانعا نە جەتسىن. جۇڭگو اتىنان سىنعا تۇسەتىن ەرلانبەك باۋىرىما دا، قازاق ەلىنىڭ نامىسىن قورعايتىن بۇل جاقتاعى وتانداستارىما دا تەك ساتتىلىك جولداس بولسىن دەپ تىلەيمىن.
"قازاقپارات"
كۇنسۇلتان وتارباي.
