الماتىدا «قالقامان» ستانساسىنان «بارلىق» بازارىنا دەيٸن سوزىلاتىن جاڭا مەترو جەلٸسٸنٸڭ جوبالىق-سمەتالىق قۇجاتتاماسىن ەزٸرلەۋ باستالدى. بۇل ماقساتقا قالالىق بيۋدجەتتەن 2,96 ملرد تەڭگە بٶلٸندٸ, دەپ حابارلايدى dalanews.kz.
مەملەكەتتٸك ساتىپ الۋ پورتالىندا جوبالاۋ جۇمىستارىنا ارنالعان كونكۋرس جارييالاندى. ەلەۋەتتٸ مەردٸگەرلەردەن ٶتٸنٸم قابىلداۋ 4-9 ماۋسىم ارالىعىندا جٷرگٸزٸلەدٸ.
جوبا اۆانسسىز ٸسكە اسىرىلادى. ياعني مەردٸگەر بارلىق جۇمىستى ٶز قاراجاتى ەسەبٸنەن ورىنداۋى تيٸس, ال تٶلەم جوبالىق-سمەتالىق قۇجاتتاما تولىق دايىندالىپ, تاپسىرىلعاننان كەيٸن عانا جٷزەگە اسىرىلادى. سونىمەن قاتار ورىنداۋشى ٷش جىلدىق كەپٸلدٸك بەرۋٸ قاجەت.
جاڭا مەترو جەلٸسٸ اباي داڭعىلى بويىمەن باتىس باعىتتا جالعاسىپ, كەيٸن الاتاۋ داڭعىلىنا بۇرىلىپ, رايىمبەك داڭعىلىنا دەيٸن جەتەدٸ.
جوبا اياسىندا ٷش جاڭا جەراستى ستانساسىن سالۋ جوسپارلانعان. ونىڭ ەكەۋٸ الاتاۋ داڭعىلىنىڭ بويىندا ورنالاسادى. بٸر ستانسا اباي داڭعىلىنان سولتٷستٸككە قاراي, ەكٸنشٸسٸ تٶلە بي كٶشەسٸنە جاقىن ماڭدا سالىنادى. ال سوڭعى ستانسا «بارلىق» بازارىنىڭ اۋماعىندا ورنالاسپاق.
قالا بيلٸگٸنٸڭ مەلٸمەتٸنشە, جاڭا جەلٸ الماتىنىڭ باتىس بٶلٸگٸندەگٸ كٶلٸك جٷكتەمەسٸن ازايتىپ, تۇرعىنداردىڭ قوعامدىق كٶلٸككە قولجەتٸمدٸلٸگٸن ارتتىرۋعا مٷمكٸندٸك بەرەدٸ.
