الماتىنىڭ تۇركسىب اۋدانىنداعى گاز قۇبىرىنىڭ جارىلۋىنا بايلانىستى پوليسيا تەرگەۋ امالدارىن باستادى. قازىرگى تاڭدا گاز قۇبىرى قالپىنا كەلتىرىلگەن، دەپ حابارلايدى Dalanews.kz.
الماتىنىڭ تۇركسىب اۋدانىنداعى كارىز قۇبىرلارىن ءوز بەتىنشە توسەۋ بارىسىندا بۇلىنگەن ورتاشا قىسىمدى جەراستى گاز قۇبىرى كوممۋنالدىق قىزمەتتىڭ جەدەل ءىس-قيمىلىنىڭ ارقاسىندا قالپىنا كەلتىرىلدى. ول «ۋ اسيمى» مەكەمەسىنە كارىز قۇبىرلارىن ءوز بەتىنشە تارتۋ بارىسىندا زاقىمدانعان.
جەكە تۇلعالار قالالىق قىزمەتتەردىڭ كەلىسىمىنسىز تۇندە اسفالتتى تەسىپ، گاز قۇبىرىن زاقىمداعان. اۋەسقوي ءارى جاۋاپسىز ارەكەتتەردىڭ سالدارىنان بىرنەشە قازاندىقتىڭ جۇمىسى توقتاتىلدى.
جوندەۋ-قالپىنا كەلتىرۋ جۇمىستارىنا «QazaqGaz Aimaq» اق-نىڭ 150 جۇمىسشىسى مەن 6 تەحنيكا بىرلىگى جۇمىلدىرىلدى. تۇتىنۋشىلاردىڭ ءبىر بولىگىن ۇزدىكسىز جىلۋمەن قامتاماسىز ەتۋ ماقساتىندا «اتكە» ءجشس-نىڭ «اۋەجاي» قازاندىعى ءماجبۇرلى تۇردە رەزەرۆتىك وتىن – مازۋتقا اۋىستىرىلدى.
ساعات 14:00-دەگى جاعداي بويىنشا گاز قۇبىرىنداعى اقاۋ جويىلدى. ماماندار جۇيەگە قىسىم سىناعىن جۇرگىزەدى، سودان كەيىن تۇتىنۋشىلاردىڭ قاۋىپسىزدىگىن قامتاماسىز ەتۋ ماقساتىندا ءاربىر ۇيگە بارىپ، گازدى كەزەڭ-كەزەڭىمەن قوسۋ جۇمىستارىن جۇرگىزەدى.
الماتىنىڭ قالا قۇرىلىسى باقىلاۋ باسقارماسى بۇل فاكت بويىنشا جوسپاردان تىس تەكسەرۋ جۇمىستارىن باستادى. سونىڭ ناتيجەسىندە اكىمشىلىك شارالار قابىلدانىپ، زاڭبۇزۋشىلىقتاردى جويۋ تۋرالى نۇسقاما بەرىلەدى.
سونىمەن قاتار، بۇزۋشىلىق سالدارىن جويۋعا كەتكەن بارلىق شىعىن كىنالى تۇلعاعا جۇكتەلەدى.
