جەلىدە الماتىدا اۋەزوۆ اۋدانى ياسساۋي كوشەسىندە جاڭا اسفالت وپىرىلعانى كورىنەتىن ۆيدەولار تارادى. سالدارىنان اۆتوبۋستاردىڭ قوزعالىسى توقتاپ قالعان، - دەپ حابارلايدى Dalanews.kz.
الماتى اكىمدىگىنىڭ باسپا ءسوز قىزمەتى وكىلى جاعدايعا پىكىر ءبىلدىردى. رەسمي مالىمەتكە سۇيەنسەك، 17 قىركۇيەكتە تاڭەرتەڭ ياسساۋي كوشەسىنىڭ داستان كوشەسىمەن قيىلىسىندا جول جابىنىنىڭ شامامەن 100 شارشى مەتر اۋماقتاعى بولىگى وپىرىلعان.
"بۇعان دەيىن "سپەسكوممۋنستروي" مەردىگەر ۇيىمى ۇزىندىعى 2،8 شاقىرىم بولاتىن كارىز جەلىلەرىن سالعان بولاتىن. جۇرگىزىلگەن تەكسەرىس بارىسىندا نوسەر جاۋىن كەزىندە ابونەنتتىك جەلىلەر ترانشەيالارى شايىلىپ، توپىراق جۇمسارعانى انىقتالدى. سونىڭ سالدارىنان جول جابىندىسىندا ويىق پايدا بولىپ، اسفالت وپىرىلعان"، - دەپ جازىلعان حابارلامادا.
اكىمدىك وكىلدەرى ءقازىر جول توسەمىن قالپىنا كەلتىرۋ جۇمىستارى جۇرگىزىلىپ جاتقانىن مالىمدەدى. "جوندەۋ جۇمىستارى 18 قىركۇيەكتە اياقتالادى"، - دەپ سەندىردى جاۋاپتىلار.
"قازىرگى تاڭدا سەبەپتەردى انىقتاۋ ماقساتىندا قوسىمشا تەكسەرىس جۇرگىزىلىپ جاتىر. ياسساۋي كوشەسىندەگى اسفالت جابىنىنىڭ ويىلۋ سەبەپتەرىن ناقتىلاۋ ءۇشىن قالالىق قۇرىلىس باقىلاۋ باسقارماسىنا ساۋال جولداندى. سەبەبى توپىراقتىڭ دۇرىس نىعىزدالماۋى ىقتيمال نۇسقا رەتىندە قاراستىرىلىپ وتىر. ونىڭ ناقتى سەبەبى تەكسەرىس ناتيجەسىندە بەلگىلى بولادى"، - دەدى اكىمدىك وكىلدەرى.
