Jelide Almatyda Áýezov aýdany Iassaýi kóshesinde jańa asfalt opyrylǵany kórinetin videolar tarady. Saldarynan avtobýstardyń qozǵalysy toqtap qalǵan, - dep habarlaidy Dalanews.kz.
Almaty ákimdiginiń baspasóz qyzmeti ókili jaǵdaiǵa pikir bildirdi. Resmi málimetke súiensek, 17 qyrkúiekte tańerteń Iassaýi kóshesiniń Dastan kóshesimen qiylysynda jol jabynynyń shamamen 100 sharshy metr aýmaqtaǵy bóligi opyrylǵan.
"Buǵan deiin "Spetskommýnstroi" merdiger uiymy uzyndyǵy 2,8 shaqyrym bolatyn káriz jelilerin salǵan bolatyn. Júrgizilgen tekseris barysynda nóser jaýyn kezinde abonenttik jeliler transheialary shaiylyp, topyraq jumsarǵany anyqtaldy. Sonyń saldarynan jol jabyndysynda oiyq paida bolyp, asfalt opyrylǵan", - dep jazylǵan habarlamada.
Ákimdik ókilderi qazir jol tósemin qalpyna keltirý jumystary júrgizilip jatqanyn málimdedi. "Jóndeý jumystary 18 qyrkúiekte aiaqtalady", - dep sendirdi jaýaptylar.
"Qazirgi tańda sebepterdi anyqtaý maqsatynda qosymsha tekseris júrgizilip jatyr. Iassaýi kóshesindegi asfalt jabynynyń oiylý sebepterin naqtylaý úshin Qalalyq qurylys baqylaý basqarmasyna saýal joldandy. Sebebi topyraqtyń durys nyǵyzdalmaýy yqtimal nusqa retinde qarastyrylyp otyr. Onyń naqty sebebi tekseris nátijesinde belgili bolady", - dedi ákimdik ókilderi.
