2025 جىلى 19 اقپاندا ساعات 09:30 - دا الماتى قالاسىنداعى "قازاقستان" قوناق ۇيىندە (دوستىق داڭعىلى، 52/2) يۋنەسكو قاۋىمداستىقتارى مەن كلۋبتارىنىڭ ءبىرىنشى جاھاندىق جاستار فورۋمى (GYF) وتەدى. بۇل فورۋم الەمنىڭ 60-قا جۋىق ەلىنەن 150-دەن استام قاتىسۋشىنىڭ باسىن بىرىكتىرەدى، دەپ حابارلايدى Dalanews.kz.
فورۋمدى يۋنەسكو جانە دۇنيەجۇزىلىك يۋنەسكو كلۋبتارى مەن قاۋىمداستىقتارىنىڭ فەدەراسياسى (WFUCA)، قازاقستاندىق ۇلتتىق يۋنەسكو كلۋبتارىنىڭ فەدەراسياسىنىڭ، قازاقستان جانە فرانسيا يۋنەسكو ىستەرى جونىندەگى ۇلتتىق كوميسسيالارىنىڭ، سونداي-اق ق ر سىرتقى ىستەر مينيسترلىگىنىڭ، ق ر مادەنيەت جانە اقپارات مينيسترلىگىنىڭ جانە الماتى قالاسى اكىمدىگىنىڭ قولداۋىمەن ۇيىمداستىرىلادى.
ەكى كۇن بويى يۋنەسكو كلۋبتارى مەن قاۋىمداستىقتارىنىڭ وكىلدەرى، سونداي-اق ۇكىمەتتىك، اكادەميالىق جانە بيزنەس سالاسىنىڭ ماماندارى، سونىڭ ىشىندە يۋنەسكو ساراپشىلارى الەۋەتتى ارتتىرۋ، جاستاردىڭ قۇقىقتارى مەن مۇمكىندىكتەرىن كەڭەيتۋ، جاساندى ينتەللەكتىنى پايدالانۋ ەتيكاسى، سيفرلىق تەحنولوگيالاردى قولدانۋ، تۇراقتى تۋريزم، كليماتتىڭ وزگەرۋى، ينكليۋزيا جانە كوركەم ءبىلىم ماسەلەلەرىن تالقىلايدى.
ءىس-شارا اياسىندا قازاقستانعا يۋنەسكو-نىڭ ىزگى نيەت ەلشىسى ح. اببين، جاساندى ينتەللەكت سالاسىنداعى الەمدىك جەتەكشى پروفەسسور د-ر ۆ. حولمس، دۇنيەجۇزىلىك يۋنەسكو كلۋبتارى مەن قاۋىمداستىقتارىنىڭ فەدەراسياسىنىڭ اتقارۋشى كەڭەسىنىڭ مۇشەلەرى جانە باسقا دا تۇلعالار ارنايى جوعارى مارتەبەلى قوناقتار رەتىندە كەلەدى.
فورۋمنىڭ باستى ناتيجەسى – "2025-2030 جىلدارعا ارنالعان يۋنەسكو قاۋىمداستىقتارى مەن كلۋبتارى جاستارىنىڭ جول كارتاسى: تۇراقتى بولاشاقتى بىرگە قۇرۋ" قابىلداۋ بولماق. بۇل قۇجات 94 ەلدەگى 5 000-نان استام ۇيىمدى قامتيتىن قوزعالىستىڭ ستراتەگيالىق دامۋ باعىتتارىن انىقتاپ، جاستاردىڭ مۇمكىندىكتەرىن كەڭەيتەدى جانە يۋنەسكو كلۋبتارىنىڭ كوشباسشىلار جەلىسىن نىعايتادى.
بۇل باستامانى سونىمەن قاتار "Karachaganak Petroleum Operating B.V." كومپانياسى، بانك سەنتركرەديت، "قازاقستان" ءقوناقۇيى، Doscar كومپانيالار توبى جانە "شىمبۇلاق" تاۋ-شاڭعى كۋرورتى قولدادى.
