الماتىدا اۋا ساپاسىن جاقسارتۋعا باعىتتالعان جاڭا ەكولوگيالىق تالاپتار ەنگىزىلەدى، دەپ حابارلايدى Dala News.
قالادا ارنايى «تازا ايماقتار» قۇرىلادى. بۇل اۋماقتاردا وت جاعۋعا، پەش تۇتاتۋعا، كومىر مەن اعاش جاعۋعا تىيىم سالىنادى. كەيبىر اۋداندارعا ەكولوگيالىق تالاپقا ساي كەلمەيتىن كولىكتەردىڭ كىرۋى دە شەكتەلۋى مۇمكىن.
جاڭا ەرەجەلەر بيزنەسكە دە اسەر ەتەدى. كافە، بار، كەباب دۇكەندەرى مەن قوعامدىق تاماقتانۋ ورىندارى ءتۇتىن مەن ءيىستى ازايتاتىن سۇزگىلەر ورناتۋعا مىندەتتەلمەك. بۇل تالاپ مونشا مەن ساۋنا سەكىلدى ورىندارعا دا قاتىستى بولادى.
باقىلاۋ دروندار مەن ارنايى كامەرالار ارقىلى جۇرگىزىلەدى. زاڭبۇزۋشىلىقتار اۆتوماتتى تۇردە تىركەلەدى. ءار كولىككە جەكە ەكولوگيالىق ستاندارت بەلگىلەنىپ، تەك اكىمدىك رۇقسات بەرگەن ورتالىقتاردا تەكسەرۋدەن ءوتۋ مۇمكىن بولادى.
دەپۋتات تيمۋر ەلەۋسىزوۆتىڭ ايتۋىنشا، «تازا ايماقتار» ءال-فارابي جانە رايىمبەك داڭعىلدارى ماڭىن، شىعىس اينالما جولى مەن سايىن كوشەسىنىڭ بولىكتەرىن قامتۋى ىقتيمال.
جوبا الدىمەن پيلوتتىق رەجيمدە ىسكە قوسىلادى. بۇل كەزەڭدە ايىپپۇل سالىنبايدى. ەگەر ناتيجە وڭ بولسا، «تازا ايماقتار» قالا اۋماعىندا كەزەڭ-كەزەڭىمەن كەڭەيتىلەدى. شەنەۋنىكتەردىڭ ايتۋىنشا، جاڭا تالاپتار شامامەن ءبىر جىلدان كەيىن تولىق كۇشىنە ەنەدى.
