قور ارقىلى اقىننىڭ تاريحي تۇلعا رەتىندەگى ايشىقتى بەينەسى، ەرەن ەڭبەكتەرى مەن شىعارماشىلىعى جان-جاقتى زەرتتەلىپ، عىلىمي اينالىمعا ەنگىزىلىپ، جاستارعا كوبىرەك ناسيحاتتالا تۇسپەك. سونىڭ ءبىر باعىتى رەتىندە وتكىزىلگەن بايقاۋعا 4 جوعارى وقۋ ورنىنان 16 ستۋدەنت قاتىستى. ولار اقىن ءومىرى مەن شىعارماشىلىعىن تانىپ ءبىلۋ دەڭگەيىن كوپ الدىندا كورسەتىپ، تاڭجارىق ولەڭدەرىن مانەرلەپ وقىپ سىنعا ءتۇستى. بەلگىلى اقىن، جۋرناليست، ونەرپازداردان قۇرالعان قازىلار القاسىنىڭ شەشىمى بويىنشا باس جۇلدەنى اتالعان وقۋ ورنىنىڭ ستۋدەنتى ايجان مەلدەبەك يەلەندى. 1-ورىندى اباي اتىنداعى قازۇپۋ-دىڭ ستۋدەنتى سالتانات اناپيايەۆا، 2-ورىندى قىزپۋ-دىڭ ستۋدەنتى اقگۇل ايداربەك قىزى، 3-ورىندى اتالعان وقۋ ورنىنىڭ ستۋدەنتى قاماجاي ەركەبايەۆا قانجىعالادى. جۇلدەگەرلەر قارجىلاي سىياقىعا قول جەتكىزدى. سونىمەن قاتار، اقىت ءۇلىمجى ۇلى، اسىلقان مىڭجاسار ۇلى جانە تاڭجارىقتانۋشى تىلەۋجان ساقالوۆ اتىنداعى ارنايى جۇلدەلەر بەرىلدى. تىلەۋجان اعامىزدىڭ جارى بوپەن جەكسەبايەۆا ءوزى كەلىپ جۇلدەنى بۇيىرعان يەسىنە تابىس ەتتى. قىسقاسى، جاستار جارادى، شابىتتان شىعارما جازىپ، وتتى، رۋحتى اقىننىڭ جىرلارىن جاتقا وقىدى، ءمان-ماڭىزىن كوكەيگە توقىدى. تاڭجارىقتانۋعا بەلسەنە كىرىسىپ، جاقسى ناتيجە كورسەتە الاتىنىن شىن دالەلدەدى. جاستاردىڭ ۇلى اقىن، ۇلت قايراتكەرىنىڭ رۋحىنان ۇلكەن اسەر الىپ، تەبىرەنە قالام تەربەپ، تەرەڭ تاني تۇسكەنى كوڭىل قۋانتادى. وسى باعىتتاعى يگى ىستەر الداعى ۋاقىتتا دا جالعاسا بەرمەك. يگى شاراعا بەلگىلى سىنشى، قالامگەرلەر مەن جاستار قاتىستى. تاڭجارىق اندەرى شىرقالىپ، ناسيحاتشىلارىنا قور اتىنان العىس حات بەرىلدى.
سەرىك قالييەۆ، اقىن، قازىلار القاسىنىڭ ءتوراعاسى:
«تاڭجارىق وقۋلارى» – جىل وتكەن سايىن ءورىسى كەڭەيىپ، قاناتىن كەڭگە جايىپ كەلە جاتىر. تاڭجارىق مۇرالارىن ناسيحاتتاۋ، ۇرپاق ساناسىندا قايتا جاڭعىرتۋ ءىسى جىلدان-جىلعا جاندانىپ كەلە جاتىر دەپ ايتۋعا بولادى. سونىڭ ءبىر كورىنىسى، بۇگىنگى «تاڭجارىق وقۋلارىنا» تىڭعىلىقتى، تياناقتى دايىندالىپ كەلگەن جوعارعى وقۋ ورىندارىنىڭ ستۋدەنتتەرىنىڭ ونەرىنە ءتانتتى بولدىق. سوندىقتان دا ءوز دەڭگەيىندە ءوتتى دەپ ويلايمىن. مانەرلەپ وقۋ كەزەڭىندە ءمۇدىرىپ، ۇمىتىپ قالعان ۇمىتكەرلەردى بايقاعان جوقپىز. تاڭجارىق شىعارمالارىن جاڭا قىرىنان وزدەرىنشە پايىمداپ، زەردەلەپ-زەرتتەگەن كەيبىر ۇشقىندى ساۋلەلى ويلاردى بايقادىق. تاڭجارىق شىعارمالارى، تاڭجارىق مۇراسى بۇگىنگى ۇرپاقتىڭ رۋحاني ازىعىنا، تالىم-تاربيەسىنە، ەلدى، وتاندى سۇيۋىنە، پاتريوتتىق سەزىمدى قالىپتاستىرۋىنا بىردەن-بىر ناسيحاتشى ءرول اتقارادى دەپ ويلايمىن.
ايجان مەلدەبەك، قىزپۋ-دىڭ 2-كۋرس ستۋدەنتى، باس جۇلدە يەگەرى:
تاڭجارىق وقۋلارىنا ەكىنشى مارتە قاتىسىپ وتىرمىن. سايىس بولعاننان سوڭ، بەدەلدى ۋنيۆەرسيتەت ستۋدەنتتەرمەن بايگەگە تۇسكەننەن كەيىن ولاردان وق بويى وزىپ شىعۋعا تالپىناسىڭ. ول ءۇشىن ەڭبەك جولىندا تەر توگىلۋى قاجەت. تاڭجارىقتى جان جاقتى زەرتتەپ، ونىڭ شىعارماشىلىعىمەن تانىس بولۋ كەرەك. ارينە، تانىستىق. اقىننىڭ ءومىر جولىنداعى قيىندىقتارىنا وكىنىشپەن قارادىق.كەشە ءبىز كىم ەدىك؟ تاڭجارىقتى تانىماق تۇگىلى الاشتىڭ بۇنداي ازاماتى بار ەكەنىن دە بىلمەدىك. ال، بۇگىن وسى بايقاۋدىڭ ارقاسىندا تاڭجارىقتى ابايشا تانىپ جاتقان جايىمىز بار. بۇل جولى تاڭجارىق بايقاۋىنان العان اسەرىم ەستەن كەتپەستەي بولدى. وسى جولدا بيىك شىڭنان كورىنۋىمە كومەك بەرگەن ءبىرتۋار ازاماتتارعا، اتا -اناما، مەنى رۋحاني شابىتتاندارىپ ءۇمىت اتقان دوستارىما ايتار العىسىم شەكسىز!
جارقىن سالەن ۇلى
سۋرەتتى تۇسىرگەن: سارسەنبەك قىزايبەك ۇلى
