الماتىدا جول-كولىك وقيعالارىنىڭ سانى «سەرگەك» اپپاراتتىق-باعدارلامالىق كەشەنىن ەنگىزگەننەن كەيىن 17%-عا ازايدى، – دەپ حابارلايدى Dalanews.kz الماتى قالاسى اكىمىنىڭ باسپا ءسوز قىزمەتىنە سىلتەمە جاساپ.
قالالىق سيفرلاندىرۋ باسقارماسىنىڭ باسشىسى ولجاس جانابەكتىڭ ايتۋىنشا، «سەرگەك» كەشەندەرىنىڭ ءۇش جىلدىق جۇمىسى بارىسىندا الماتى جولدارىندا اپاتتار مەن ءولىم-جىتىم دەڭگەيى ايتارلىقتاي تومەندەدى.
بۇگىندە مەگاپوليستە 1641 «سەرگەك» كەشەنى جۇمىس ىستەپ تۇر، بۇل 9152 بەينەباقىلاۋ كامەراسىن قامتيدى. 2021 جىلدان 2024 جىلدىڭ شىلدەسىنە دەيىنگى ارالىقتا جولدارداعى ءولىم-جىتىم 40%-عا، جول-كولىك وقيعالارىنىڭ سانى 17%-عا، ال اپات سالدارىنان جاراقات العانداردىڭ سانى 30%-عا ازايدى.
سونىمەن قاتار، جوبا ىسكە قوسىلعاننان بەرى قالالىق بيۋدجەتكە 44،08 ميلليارد تەڭگە تۇسكەن.
ايتا كەتەيىك، تەك بيىلعى جىلدىڭ توعىز ايىندا الماتىدا 3 ميلليوننان استام قۇقىق بۇزۋشىلىق تىركەلىپ، 18،6 ميلليارد تەڭگەدەن استام ايىپپۇل وندىرىلگەن.
