جاڭادان تىركەلگەن عيماراتتارعا قۇتقارۋشىلار 3 جىل بويى مۇلدەم اياق باسا المايدى. سوندىقتان ءبىر عيماراتى كۇلگە اينالعان «الماتى تاۋەرستى» ماماندار تەك كەلەر جىلى تەكسەرمەك بولعان.
قوعامدىق ورىندارداعى ورتكە بىردەن-بىر سەبەپ – قاۋىپسىزدىك ەرەجەلەرىنىڭ ساقتالماۋى. بۇگىندە كاسىپكەرلەردىڭ كوبى زاڭمەن تىيىم سالىنعان قوندىرعىلارمەن جۇمىس ىستەيدى. ءبىراق قۇتقارۋشىلار مۇنىڭ ءبىرىن بىلسە، بىرىنەن مۇلدەم بەيحابار.اسىرەسە، جۇگەنسىز كاسىپكەرلەر باعاسى ارزان گاز باللونىنا قۇمار. ماسەلەن، جازدا ورتكە ورانعان ءبىر اسحانانىڭ وزىنەن قۇتقارۋشىلار 14 باللوندى ساناپ شىعارىپتى. ءبىراق بۇعان قاراماستان، ماماندار جەكەمەنشىك نىساندارعا كەز كەلگەن ۋاقىتتا تەكسەرە المايدى. سەبەبى، ەش نەگىزسىز، جوسپاردان تىس تەكسەرۋ جۇرگىزۋگە زاڭ رۇقسات ەتپەيدى.
الماتى قالاسى توتەنشە جاعدايلار دەپارتامەنتىنىڭ باستىعى سەرىك اۋباكىروۆ:
– ەش سەبەپسىز جەكەمەنشىك نىساندارعا جوسپاردان تىس تەكسەرۋ جۇرگىزە المايمىز. تەك عيماراتتىڭ قاۋىپسىزدىگى تۋرالى شاعىم تۇسسە عانا نىسان ءجىتى تەكسەرىلەدى. ءبىراق بۇلاي شاعىمداناتىندار جوقتىڭ قاسى، – دەدى.
ماماندار اۋماعى 1500 شارشى مەتردەن اساتىن نىسانداردى عانا تەكسەرۋگە قاۋقارلى. ءبىراق ونىڭ ءوزى جىلىنا ءبىر رەت جۇرگىزىلەدى. سوندىقتان، قۇتقارۋشىلار كوبىنە عيمارات يەسىن ءورت قاۋىپسىزدىگى ەرەجەلەرىنەن حاباردار ەتۋمەن شەكتەلەدى. ەرەجەنى ءتيىستى دەڭگەيىندە ساقتاپ جۇرگەن مۇنداي كاسىپكەرلەر ءقازىر بىرەن-ساران. سەبەبى، تالاپقا ساي قۇرىلعىلاردىڭ باعاسى ارزان ەمەس. نەگىزى ءار نىساندا ورتكە قارسى قۇرالدار بولۋى شارت. بۇعان قوسا، كوپقاباتتى ءۇيدىڭ استىندا ورنالاسقان قوعامدىق ورىنداردا تەك ەلەكتروندىق پەشتەر قولدانىلۋى قاجەت.
ال كاسىپكەر، مەيرامحانا ديرەكتورى دۋلات عازيزوۆ:
– ءورتتىڭ الدىن-الۋ ءۇشىن قاجەتتى بارلىق قۇرىلعىلاردى ساتىپ الدىق. عيماراتتا وت اتىمەن جوق. تاماقتار ەلەكتروندىق پەشپەن پىسىرىلەدى. ارينە، مۇنىڭ بارىنە قىرۋار قارجى كەتتى، – دەيدى.
ءقازىر قوعامدىق ورىنداردىڭ كوبىندە ورتكە قارسى جۇيە اتىمەن جوق. ماسەلەن، بىرەر كۇن بۇرىن عانا كۇلگە اينالعان «الماتى تاۋەرستە» دە مۇنداي جۇيە ىسكە قوسىلماعان. بۇعان قوسا، نىسان 3 جىل بويى ارنايى تەكسەرىستەن وتپەگەن. سەبەبى، قۇتقارۋشىلار زاڭعا سايكەس عيماراتتى كەلەر جىلى عانا تەكسەرمەك بولعان.
