Almatyda órt nelikten kóbeidi?
Jańadan tirkelgen ǵimarattarǵa qutqarýshylar 3 jyl boiy múldem aiaq basa almaidy. Sondyqtan bir ǵimaraty kúlge ainalǵan «Almaty Taýersti» mamandar tek keler jyly teksermek bolǵan.
Qoǵamdyq oryndardaǵy órtke birden-bir sebep – qaýipsizdik erejeleriniń saqtalmaýy. Búginde kásipkerlerdiń kóbi zańmen tyiym salynǵan qondyrǵylarmen jumys isteidi. Biraq qutqarýshylar munyń birin bilse, birinen múldem beihabar.Ásirese, júgensiz kásipkerler baǵasy arzan gaz ballonyna qumar. Máselen, jazda órtke oranǵan bir ashananyń ózinen qutqarýshylar 14 ballondy sanap shyǵarypty. Biraq buǵan qaramastan, mamandar jekemenshik nysandarǵa kez kelgen ýaqytta teksere almaidy. Sebebi, esh negizsiz, jospardan tys tekserý júrgizýge zań ruqsat etpeidi.
Almaty qalasy tótenshe jaǵdailar departamentiniń bastyǵy Serik Áýbákirov:
– Esh sebepsiz jekemenshik nysandarǵa jospardan tys tekserý júrgize almaimyz. Tek ǵimarattyń qaýipsizdigi týraly shaǵym tússe ǵana nysan jiti tekseriledi. Biraq bulai shaǵymdanatyndar joqtyń qasy, – dedi.
Mamandar aýmaǵy 1500 sharshy metrden asatyn nysandardy ǵana tekserýge qaýqarly. Biraq onyń ózi jylyna bir ret júrgiziledi. Sondyqtan, qutqarýshylar kóbine ǵimarat iesin órt qaýipsizdigi erejelerinen habardar etýmen shekteledi. Erejeni tiisti deńgeiinde saqtap júrgen mundai kásipkerler qazir biren-saran. Sebebi, talapqa sai qurylǵylardyń baǵasy arzan emes. Negizi ár nysanda órtke qarsy quraldar bolýy shart. Buǵan qosa, kópqabatty úidiń astynda ornalasqan qoǵamdyq oryndarda tek elektrondyq peshter qoldanylýy qajet.
Al kásipker, meiramhana direktory Dýlat Ǵazizov:
– Órttiń aldyn-alý úshin qajetti barlyq qurylǵylardy satyp aldyq. Ǵimaratta ot atymen joq. Tamaqtar elektrondyq peshpen pisiriledi. Árine, munyń bárine qyrýar qarjy ketti, – deidi.
Qazir qoǵamdyq oryndardyń kóbinde órtke qarsy júie atymen joq. Máselen, birer kún buryn ǵana kúlge ainalǵan «Almaty Taýerste» de mundai júie iske qosylmaǵan. Buǵan qosa, nysan 3 jyl boiy arnaiy tekseristen ótpegen. Sebebi, qutqarýshylar zańǵa sáikes ǵimaratty keler jyly ǵana teksermek bolǵan.
