بيىل الماتى تۇرعىندارى مەن قوناقتارى ناۋرىز مەيرامىن كەڭ كولەمدە تويلايدى، قالادا ءىس-شارالاردا ءداستۇر مەن جاڭاشىلدىق ۇيلەسىم تابادى،- دەپ حابارلايدى Dalanews.kz

اشىق اسپان استىنداعى اۋقىمدى كونسەرتتەر، سپورتتىق جارىستار، جارمەڭكەلەر مەن ءتۇرلى ءىس-شارالار «كوكتوبە» ساياباعىندا، اباي الاڭىندا، پانفيلوۆ جاياۋ جۇرگىنشىلەر كوشەسىندە، ارباتتا جانە استانا الاڭىندا  وتەدى. سونىمەن قاتار، مەرەكەلىك ءىس-شارالار شاھاردىڭ بارلىق اۋدانىندا ۇيىمداستىرىلادى. قالا تەاترلارى مەن سيرك قايىرىمدىلىق قويىلىم ۇسىنسا، ءىرى كونسەرت زالدارىندا قازاقستاندىق جانە شەتەلدىك جۇلدىزدار ونەر كورسەتەدى. جالپى، الماتىدا ناۋرىزناما اياسىندا 100-دەن استام ءىس-شارا وتەدى.

استانا الاڭى

21 ناۋرىز كۇنى ساعات 11:00-دە استانا الاڭىندا «الماتى – ناۋرىز قۇشاعىندا» اتتى نەگىزگى سالتاناتتى كونسەرت وتەدى. ساحنادا ايگىلى «دوس-مۇقاسان» ءانسامبلى، مايرا مۇحامەد قىزى، جانار ايجانوۆا، ءومىرقۇل اينيازوۆ، جازيرا بايىربەكوۆا، يگور بلاگورودنىي، تولەگەن راحىمبايەۆ، «كەشYou» توبى، دينايا، AyaFunk جانە باسقا دا ارتيستەر ونەر كورسەتەدى.

«الاتاۋ» ءداستۇرلى ونەر تەاترىنىڭ جانە «جاڭا عاسىر» تەاترىنىڭ ارتيستەرى، «الماتى اۋەندەرىنىڭ» سوليستەرى، «سازگەن سازى» فولكلورلى-ەتنوگرافيالىق ءانسامبلى دە كونسەرتتىك باعدارلاما ۇسىنادى.

سونىمەن قاتار، 21-22 ناۋرىز كۇندەرى ساعات 18:00-دە وسى الاڭدا تانىمال انشىلەر قاتىساتىن ەكى كۇندىك Juldyzdy Almaty كەشكى فەستيۆالى وتەدى.

استانا الاڭىندا سپورتتىق ويىندار، قولونەر جارمەڭكەسى جانە وتباسى مۇشەلەرىمەن قاتىسىپ، قىزىقتايتىن باسقا دا ءىس-شارالار ۇيىمداستىرىلادى. مۇندا مەرەكەلىك كوڭىل-كۇي سىيلايتىن ءتۇرلى فوتوزونالار مەن ارت-نىساندار دا ورناتىلادى.

اباي الاڭى

21-25 ناۋرىز كۇندەرى ساعات 10:00-دەن 16:00-گە دەيىن اباي الاڭىندا مادەني مۇرا مەن زاماناۋي تەحنولوگيانى بىرىكتىرەتىن NauryzFest فەستيۆالى وتەدى.

رەسپۋبليكا سارايىنىڭ الدىندا ەرەكشە بەزەندىرىلگەن كيىز ۇيلەر تىگىلەدى. «رۋحاني مۇرا» كيىز ۇيىندە اباي، جامبىل جانە دينا ويناعان مۋزىكالىق اسپاپتاردىڭ كوشىرمەسى قويىلىپ، كونسەرت وتەدى. «الماتىعا ساياحات» كيىز ۇيىندە قوناقتار قالانىڭ كورىكتى جەرلەرىن ۆيرتۋالدى فورماتتا تاماشالاي الادى. سونداي-اق، شەبەر مارات بەكسۇلتانوۆتىڭ قولىنان شىققان نەبارى 20 مينۋت ىشىندە قۇراستىرۋعا بولاتىن «يننوۆاسيالىق كيىز ءۇي» ورناتىلادى.

اباي الاڭىندا التىباقان ورناتىلادى، ۇلتتىق ويىندار مەن ءتۇرلى جارىستار وتكىزەدى. سونداي-اق اباي قۇنانباي ۇلىنىڭ 180 جىلدىعىنا ارنالعان ارت-نىساندار دا بوي كوتەرەدى. 21-22 ناۋرىز كۇندەرى كەشكى ۋاقىتتا الاڭدا بەلگىلى انشىلەر كونسەرت قويادى.

فەستيۆال اياسىندا بىرنەشە كۇن بويى اۋقىمدى قولونەر جارمەڭكەسى جۇمىس ىستەيدى. قوناقتار اعاش ويۋ، زەرگەرلىك بۇيىم جاساۋ، بىلعارى وڭدەۋ جانە كيىز باسۋ ونەرىن تاماشالاي الادى. كيىز ۇيلەردە شەبەرلىك دارىستەرى ۇيىمداستىرىلىپ، قوناقتار توقىما توقۋ، ۇلتتىق ويۋ-ورنەكپەن اشەكەي بۇيىم دايىنداۋ جانە قازاقتىڭ ءداستۇرلى مۋزىكالىق اسپاپتارىن جاساۋ ونەرىن ۇيرەنە الادى.

روبوتتار، كينەتيكالىق تۋننەل جانە ۆيرتۋالدى اۆاتار

پانفيلوۆ جاياۋ جۇرگىنشىلەر كوشەسى (قابانباي باتىر كوشەسىنەن تولە بي كوشەسىنە دەيىن) زاماناۋي تەحنولوگيا مەن مادەني كەڭىستىككە اينالادى. كىرەبەرىستە ەرەكشە اسەر بەرەتىن LED-ەكراندى اركا ورناتىلادى، ال عالىمجان اتتى ۆيرتۋالدى اۆاتار مەرەكەلىك باعدارلاما تۋرالى ايتىپ بەرەدى.

مۇندا حالىق مۋلتيمەديالىق قوندىرعى ارقىلى ءوزىن ۇلتتىق كيىم كيىپ تۇرعانداي كورەدى، سيفرلىق سۋبۇرقاقتا جۇرەكجاردى لەبىزىن جولداپ، VR ارقىلى ەجەلگى داۋىرگە ساياحات جاساپ، ساداق اتۋ سايىسىنا قاتىسادى، ۆيرتۋالدى شايقاستى تاماشالايدى جانە ناۋرىز مەيرامىنىڭ تاريحىنا ۇڭىلەدى.

بۇل الاڭدا كينەتيكالىق تۋننەل ورناتىلىپ، وندا ۇلتتىق ويۋ-ورنەكتەر قوناقتاردىڭ قيمىلىنا ساي قوزعالادى. گاسترونوميالىق ايماقتا روبوت داياشىلار، اسپازدار مەن باريستالار جۇمىس ىستەيدى، ال ينتەللەكتۋالدىق «وي-دۋمان» ويىنى الماتىلىقتار مەن قوناقتاردىڭ ناۋرىز تۋرالى ءبىلىمىن تەكسەرەرۋگە مۇمكىندىك بەرەدى. پانفيلوۆ كوشەسىندە «عارىشتىق كيىز ءۇي»، قايتا وڭدەلگەن ماتەريالداردان جاسالعان ارت-ينستاللياسيالار مەن قازاقستاندىق ينجەنەرلەر ازىرلەگەن روبوتوتەحنيكا كورمەسى جۇمىس ىستەيتىن بولادى. بۇل الاڭ 21 جانە 22 ناۋرىزدا جۇمىس ىستەيدى.

كىتاپ جارمەڭكەسى، جازۋشىلارمەن كەزدەسۋلەر جانە ۇلتتىق ويىندار

21-25 ناۋرىز كۇندەرى الماتىنىڭ ارباتىندا «ناۋرىز تويى – مەرەكەم، ءسالت-داستۇرىم – بەرەكەم» اتتى ءىرى كىتاپ جارمەڭكەسى وتەدى. قوناقتار جازۋشىلارمەن، پۋبليسيستەرمەن كەزدەسىپ، اقىندار مەن ءداستۇرلى ونەر شەبەرلەرىنىڭ ونەرىن تاماشالاي الادى. جاياۋ جۇرگىنشىلەر ايماعىنىڭ ورتاسىندا شاتىر ورناتىلىپ، شەبەرلىك دارىستەرى، ۇلتتىق ويىندار بويىنشا تۋرنيرلەر جانە كورسەتىلىمدەر ۇيىمداستىرىلادى.

ابايدىڭ اندەرىن 5000 ادام حورمەن ورىندايدى

22 ناۋرىز ساعات 9:30-دا الماتىدا ناۋرىز مەيرامى مەن ۇلى اباي قۇنانبايەۆتىڭ 180 جىلدىعىنا وراي اقىننىڭ اندەرىن ورىنداۋ بويىنشا اۋقىمدى حور پەرفورمانسى وتەدى. وعان بەلگىلى سوليستەر، ب.بايقاداموۆ اتىنداعى مەملەكەتتىك حور كاپەللاسىنىڭ ارتيستەرى، مۋزىكالىق وقۋ ورىندارىنىڭ ستۋدەنتتەرى جانە قالا تۇرعىندارى، جالپى سانى 5 مىنان اساتىن الماتىلىق قاتىسادى. ولار اباي داڭعىلى بويىندا جينالىپ، «كوزىمنىڭ قاراسى»، «جەلسىز تۇندە جارىق اي» جانە «ايتتىم سالەم، قالامقاس» اندەرىن ورىندايدى. ءىس-شارا اباي داڭعىلى بويىندا (نازاربايەۆ پەن دوستىق داڭعىلدارىنىڭ اراسىندا) وتەدى.

بۇل پەرفورمانس جاڭارۋ مەن بىرلىكتىڭ سيمۆولىنا اينالىپ، قالانى ۇلتتىق مۇرا رۋحىنا بولەيدى. مىڭداعان قاتىسۋشىنىڭ داۋىسى ۇيلەسىم تاۋىپ، قازاق مادەنيەتىنىڭ رۋحاني قۋاتىن بەينەلەيتىن ەرەكشە مۋزىكالىق تۋىندى تۋدىرادى. بۇل ءىس-شارا رەكوردتار كىتابىنا ەنۋى مۇمكىن.

الماتىدا Nauryz Fashion Day وتەدى

18 ناۋرىز كۇنى الماتىدا ساعات 14:30-دا ناۋرىزناما ونكۇندىگى اياسىندا ۇلتتىق كيىمدەر كۇنىنە ارنالعان Nauryz Fashion Day اۋقىمدى ءسان كورسەتىلىمى وتەدى. قىزىل كىلەمنەن ءجۇرىپ وتەتىن مودەلدەر اراسىندا «الەمدى تاڭقالدىرعان قازاق اجەلەرى» جوباسىنىڭ قاتىسۋشىلارى، «ميسس قازاقستان» جوباسىنىڭ جەڭىمپازدارى بولادى، سونداي-اق ءىس-شاراعا AtelierRaushan اتەلەسى مەن Aida KaumeNOVA ءسان ءۇيى قاتىسىپ، ۇلتتىق ستيلدەگى ادەمى توپتامالارىن كورسەتەدى.

ايتا كەتەيىك، Nauryz Fashion Day-گە قاتىسۋشى مودەلدەردىڭ اراسىندا بۇعان دەيىن يتاليانىڭ ميلان قالاسىندا وتكەن ءسان اپتالىعىندا ونەر كورسەتكەن، ەندى نيۋ-يورك پەن پاريجدەگى Fashion Week-كە قاتىسۋدى جوسپارلاپ وتىرعان، قازاق ۇلتتىق كيىمدەرىن الەم ەلدەرىندە دارىپتەۋشى اپالار بار.

سونداي-اق، ۇيىمداستىرۋشىلار بارشا قالا تۇرعىندارىن اتالمىش ءىس-شارانا تاماشالاۋ ءۇشىن ەتنوستيلدە كيىنىپ كەلۋگە شاقىرادى. سول ارقىلى ناۋرىزناما اياسىندا ۇلتتىق كيىمدەر كۇنىن قولداپ، Nauryz Fashion Dayء-دىڭ قاتىسۋشىسى بولۋعا مۇمكىندىك بار.

وتەتىن ورنى: جىبەك جولى كوشەسى، اربات

تۇركى الەمىنىڭ تانىمال جۇلدىزدارى

تۇركىتىلدەس ەلدەردىڭ بەلگىلى ارتيستەرى الماتىلىقتار مەن شاھار قوناقتارىن ناۋرىز مەيرامىمەن قۇتتىقتايدى. 22 ناۋرىز كۇنى ساعات 20:00-دە «Almaty Arena» ساحناسىندا «تۇركى الەمىنىڭ مەگا جۇلدىزدارى» كونسەرتى وتەدى. وعان Sadraddin، Mustafa Sandal، Roza Zergerli، الەكسەي چۋماكوۆ، Burak Özçivit جانە «Tynda Music» وركەسترى قاتىسادى.

20-25 ناۋرىز ارالىعىندا مەترو بەكەتتەردە مۋزىكالىق پەرفورمانستار مەن مۋزەي كورمەلەرى وتەدى.

سونداي-اق، قالادا ناۋرىزناما كۇنتىزبەسىندەگى ءار كۇننىڭ يدەولوگياسى مەن ءمانىن كورسەتەتىن ءبىرقاتار تاقىرىپتىق ءىس-شارا وتەدى. باعدارلامادا سەنبىلىكتەر، قايىرىمدىلىق اكسيالارى، قويىلىمدار، ويىندار جانە ءتۇرلى ءىس-شارا بار. تولىق كەستە الماتى قالاسى اكىمدىگىنىڭ سايتىندا جاريالانعان.