الماتى تۇرعىنى قاڭتار ايىندا كوممۋنالدىق تولەمدەردىڭ بىرنەشە ەسە وسكەنىن ايتىپ، شاعىمداندى، دەپ حابارلايدى Dalanews.kz.
بۇل ماسەلەگە قاتىستى قالا اكىمى ەربولات دوسايەۆ تۇسىنىكتەمە بەرىپ، تاريفتەرگە توتەنشە وزگەرىس ەنگىزىلمەگەنىن، تەك جاڭا سارالانعان جۇيە ىسكە قوسىلعانىن مالىمدەدى.
“ءبىز تاريفتەردى كۇرت كوتەرگەن جوقپىز. تەك تۇتىنۋ كولەمىنە قاراي سارالاۋ جۇيەسىن ەنگىزدىك. ءار ادامعا قاجەت سۋدىڭ ورتاشا مولشەرى ەسەپتەلىپ، جاڭا نورمالار بەلگىلەندى. بۇل جۇيە ەسەپشوتتاردى رەتكە كەلتىرۋگە مۇمكىندىك بەرەدى. ەگەر تۇرعىندار سۋدى ۇنەمدەپ، تەك قاجەتتىلىكتەرگە پايدالانسا، بەلگىلەنگەن مولشەرلەمە جەتكىلىكتى بولادى. تەك سۋدى ارتىق اعىزباي، كراندى ۋاقىتىندا جابۋ قاجەت”، – دەدى دوسايەۆ.
سونىمەن قاتار اكىم سۋدى ۇنەمدەۋ ماسەلەسىنىڭ ماڭىزدىلىعىن اتاپ ءوتىپ، الماتىدا قوسىمشا سۋ كوزدەرىن ىزدەۋ جۇمىستارى جۇرگىزىلىپ جاتقانىن ايتتى.
“سۋ – باعا جەتپەس رەسۋرس. ءبىز جەراستى سۋ كوزدەرىن انىقتاۋ باعىتىندا جۇمىس ىستەپ جاتىرمىز. دەگەنمەن ءقازىردىڭ وزىندە قالادا سۋ قورى جەتكىلىكتى. الداعى ۋاقىتتا ونىڭ ساپاسىن جاقسارتىپ، تۇتىنۋ مولشەرىن ازايتۋ ءۇشىن ءتيىستى شارالار قولعا الىنادى”، – دەدى قالا باسشىسى.
