الماتىدا كوللەدج ستۋدەنتىنەن تۋبەركۋلەز انىقتالعانى بەلگىلى بولدى، دەپ حابارلايدى Dala News.
قالالىق ءبىلىم باسقارماسىنىڭ مالىمەتىنشە، جاعداي اتا-انالاردىڭ وتىنىشىنەن كەيىن باقىلاۋعا الىنعان. بارلىق سانيتارلىق-ەپيدەميولوگيالىق شارالار تولىق كولەمدە جۇرگىزىلگەن.
ۆەدومستۆونىڭ مالىمەتىنە سايكەس، 2026 جىلعى 19 ناۋرىزدا 4-كۋرس ستۋدەنتى ەمحاناعا جۇگىنىپ، فليۋوروگرافيادان وتكەن كەزدە وكپە تۋبەركۋلەزى انىقتالعان.
ناتيجەسى بەلگىلى بولعاننان كەيىن ستۋدەنت بىردەن وقۋ پروسەسىنەن شەتتەتىلىپ، ءتيىستى مەديسينالىق مەكەمەگە جاتقىزىلعان.
ءبىلىم باسقارماسى ستۋدەنتتىڭ جاتاقحانادا تۇرمايتىنىن، اتا-اناسىمەن بىرگە پاتەردە تۇراتىنىن اتاپ ءوتتى.
كوللەدج اكىمشىلىگى مەن مەديسينالىق قىزمەتتەر بىرلەسىپ، شۇعىل تۇردە ەپيدەمياعا قارسى شارالار جۇرگىزگەن.
- اتاپ ايتقاندا:
- ستۋدەنت وقشاۋلانىپ، ەمى دارىگەرلەر باقىلاۋىنا الىنعان؛
- ناۋقاسپەن بايلانىستا بولعانداردىڭ بارلىعى تەكسەرۋدەن وتكەن؛
- 1738 ستۋدەنت، 150 وقىتۋشى جانە تەحنيكالىق قىزمەتكەرلەر فليۋوروگرافيادان وتكەن؛
- ستۋدەنت وقىعان توپتا (20 ستۋدەنت، 15 وقىتۋشى) قوسىمشا اتر-تەست پەن قايتا تەكسەرۋ جۇرگىزىلگەن؛
- وقۋ كورپۋستارى مەن جاتاقحانادا تولىق سانيتارلىق وڭدەۋ جاسالعان؛
- ستۋدەنتتەر مەن اتا-انالارعا ءتۇسىندىرۋ جۇمىستارى جۇرگىزىلگەن.
قالالىق ءبىلىم باسقارماسى جاعداي تولىق باقىلاۋدا ەكەنىن مالىمدەدى.
