الماتىدا پروكۋرورلىق قاداعالاۋ ناتيجەسىندە ءبىر جەكە سوت ورىنداۋشى مەملەكەتتىك ليسەنزياسىنان ايىرىلدى، دەپ حابارلايدى Dalanews.kz.
الماتى قالاسى پروكۋراتۋراسىنىڭ مالىمەتىنشە، اتقارۋشىلىق زاڭنامانىڭ ساقتالۋىن تەكسەرۋ بارىسىندا الەۋمەتتىك ماڭىزى بار ىستەر بويىنشا ءبىرقاتار زاڭ بۇزۋشىلىق انىقتالعان.
"اتاپ ايتقاندا، اليمەنت ءوندىرىپ الۋمەن بايلانىستى 6 اتقارۋشىلىق ءىس جۇرگىزۋ بويىنشا بۇزۋشىلىقتار انىقتالدى. سوت ورىنداۋشىسى ءىس جۇرگىزۋلەردى ءبىر وڭىردەن ەكىنشى وڭىرگە نەگىزسىز جولداي وتىرىپ، جاساندى جولمەن سوزبالاڭدىققا سالعان. سونداي-اق تىيىم سالۋلاردى زاڭسىز الىپ تاستاۋ، بەرەشەكتەردى ءوندىرىپ الۋ بويىنشا شارالاردى ۋاقتىلى قابىلداماۋ جانە ۋاكىلەتتى ورگانداردىڭ تالاپتارىن ەلەمەۋ جاعدايلارى انىقتالدى"، - دەپ حابارلادى الماتى قالاسىنىڭ پروكۋراتۋراسى.
ەسكە سالايىق، بۇعان دەيىن شقو-دا بۇزاقىلىق جاساعان سۋديا جازادان قۇتىلىپ كەتكەنى تۋرالى جازعان ەدىك.
ءبىر جىل بۇرىن وسكەمەن قالاسىندا مامانداندىرىلعان اۋدانارالىق ەكونوميكالىق سوتتىڭ ءتوراعاسى ەرنار ەربولاتوۆتىڭ ۇستالعانى بەلگىلى بولدى. ب ا ق مالىمەتىنشە، ول كولىكتەردى زاقىمدادى جانە قۇقىق بۇزۋشىلىقتى توقتاتۋعا تىرىسقان ادامدارعا قارسىلىق كورسەتتى دەگەن كۇدىككە ىلىنگەن.
سوت پروسەسى 2024 جىلدىڭ جازىندا باستالدى.
شىعىس قازاقستان وبلىسى پروكۋرورىنىڭ ورىنباسارى ەرلان اندابايەۆ Nege.aqsha-نىڭ رەسمي ساۋالىنا جاۋاپ رەتىندە سوت وتىرىسىنىڭ باسىندا سوتتالۋشى ەربولاتوۆ پەن جابىرلەنۋشىلەر تاراپتاردىڭ تاتۋلاسۋىنا بايلانىستى ءىستى توقتاتۋ تۋرالى ءوتىنىش بىلدىرگەنىن حابارلادى. سوت بۇل ءوتىنىشتى ءارى قاراي سوت تالقىلاۋىن وتكىزبەستەن قاناعاتتاندىردى.
"ايتا كەتۋ كەرەك، مەملەكەتتىك ايىپتاۋشى ءىستى توقتاتۋعا قارسى بولدى. الايدا، 2024 جىلعى 6 تامىزدا وسكەمەن قالاسىنىڭ №2 سوتىنىڭ قاۋلىسىمەن ەربولاتوۆ ە. قىلمىستىق كودەكستىڭ 293-بابى، 2-بولىگى بويىنشا قىلمىستىق جاۋاپكەرشىلىكتەن بوساتىلىپ، قىلمىستىق ءىس قىلمىستىق ءىس جۇرگىزۋ كودەكسىنىڭ 35-بابى، 1-بولىگى، 12-تارماعى جانە قىلمىستىق كودەكستىڭ 68-بابى، 3-بولىگى نەگىزىندە توقتاتىلدى"، – دەپ حابارلادى پروكۋراتۋرا.
سوت شەشىمىمەن كەلىسپەگەن پروكۋرور قاۋلىنىڭ كۇشىن جويىپ، قىلمىستىق ءىستى ءمانى بويىنشا جاڭا سوت تالقىلاۋىنا جىبەرۋ تۋرالى ءوتىنىش جاسادى. الايدا، شقو قىلمىستىق ىستەر جونىندەگى سوت القاسى 26 تامىزدا ءبىرىنشى ساتىداعى سوتتىڭ قاۋلىسىن وزگەرىسسىز قالدىردى.
ايتا كەتەيىك، ءقازىر شقو مامانداندىرىلعان اۋدانارالىق ەكونوميكالىق سوتىنىڭ رەسمي سايتىندا ءتوراعا مىندەتىن اتقارۋشى رەتىندە باسقا ادام – تولەگەن تۇرعامبايەۆ كورسەتىلگەن.
