الماتىدا ەمەن اعاشتارىن زاڭسىز كەسۋ فاكتىسى بويىنشا قىلمىستىق ءىس قوزعالدى، دەپ حابارلايدى Dalanews.kz.
الماتى قالاسى ەكولوگيا جانە قورشاعان ورتا باسقارماسىنىڭ ماماندارى تۇركسىب اۋدانىندا اعاشتاردى زاڭسىز كەسۋ فاكتىسىن انىقتاعان.
كوشپەلى تەكسەرۋ بارىسىندا جەر رەسۋرستارىن باسقارۋ دەپارتامەنتى، پوليسيا دەپارتامەنتى جانە تۇركسىب اۋدانى اكىمدىگىنىڭ وكىلدەرىنىڭ قاتىسۋىمەن جۇرگىزىلگەن تەكسەرۋ ناتيجەسىندە 50 جىلدان اسقان ەمەن اعاشىنىڭ زاڭسىز كەسىلگەنى راستالدى (جاسىل جەلەكتەردى تەكسەرۋ اكتىسى جاسالىپ، اعاشتاردىڭ ءتۇرى، جاسى جانە ءدىڭىنىڭ ديامەترى كورسەتىلدى). مامانداردىڭ ايتۋىنشا، بۇل اعاشتار جالپىعا ورتاق جەرلەردە وسكەنىن جانە سيرەك كەزدەسەتىن ءارى جويىلۋ ءقاۋپى بار وسىمدىكتەردىڭ تىزبەسىنە ەنگىزىلگەن.
اتالعان فاكتى بويىنشا پوليسيا دەپارتامەنتى ق ر قىلمىستىق كودەكسىنىڭ 340-بابى («اعاشتار مەن بۇتالاردى زاڭسىز كەسۋ، جويۋ نەمەسە زاقىمداۋ») بويىنشا قىلمىستىق ءىس قوزعادى.
الماتى قالاسىنداعى جاسىل جەلەكتەردى كۇتىپ-ۇستاۋ جانە قورعاۋ ەرەجەسىنە سايكەس، زاڭسىز كەسىلگەن، جويىلعان نەمەسە سيرەك جانە جويىلۋ ءقاۋپى بار وسىمدىكتەردىڭ تىزبەسىنە ەنگىزىلگەن جاسىل جەلەكتەرگە قاتىستى سول تۇردەگى (قوسىمشا تۇرلەرىن) وسىمدىكتەردىڭ ورنىنا ءجۇز ەسە كولەمدە اعاش وتىرعىزۋ قاراستىرىلعان. ق ر قىلمىستىق كودەكستىڭ 340-بابى بويىنشا 160 اەك-كە دەيىن ايىپپۇل، تۇزەۋ جۇمىستارى، قوعامدىق جۇمىستارعا تارتۋ نەمەسە مۇلىكتى تاركىلەي وتىرىپ قاماۋعا الۋ تۇرىندەگى جاۋاپكەرشىلىك كوزدەلگەن.
ايتا كەتۋ كەرەك، باسقارما ۋاكىلەتتى ورگان رەتىندە 2006 جىلعى 31 قازانداعى № 1034 ق ر ۇكىمەتىنىڭ قاۋلىسىمەن بەكىتىلگەن «سيرەك كەزدەسەتىن جانە جويىلىپ كەتۋ ءقاۋپى بار وسىمدىكتەر مەن جانۋارلار تۇرلەرىنىڭ تىزبەسىنە» ەنگىزىلگەن جاسىل جەلەكتەردى كەسۋگە رۇقسات بەرمەيدى.
ءىس الماتى قالاسىنىڭ پوليسيا دەپارتامەنتى مەن ەكولوگيا جانە قورشاعان ورتا باسقارماسىنىڭ باقىلاۋىندا.
