Almatyda emen aǵashtaryn zańsyz kesý faktisi boiynsha qylmystyq is qozǵaldy, dep habarlaidy Dalanews.kz.
Almaty qalasy Ekologiia jáne qorshaǵan orta basqarmasynyń mamandary Túrksib aýdanynda aǵashtardy zańsyz kesý faktisin anyqtaǵan.
Kóshpeli tekserý barysynda Jer resýrstaryn basqarý departamenti, politsiia departamenti jáne Túrksib aýdany ákimdiginiń ókilderiniń qatysýymen júrgizilgen tekserý nátijesinde 50 jyldan asqan emen aǵashynyń zańsyz kesilgeni rastaldy (jasyl jelekterdi tekserý aktisi jasalyp, aǵashtardyń túri, jasy jáne dińiniń diametri kórsetildi). Mamandardyń aitýynsha, bul aǵashtar jalpyǵa ortaq jerlerde óskenin jáne sirek kezdesetin ári joiylý qaýpi bar ósimdikterdiń tizbesine engizilgen.
Atalǵan fakti boiynsha politsiia departamenti QR Qylmystyq kodeksiniń 340-baby («Aǵashtar men butalardy zańsyz kesý, joiý nemese zaqymdaý») boiynsha qylmystyq is qozǵady.
Almaty qalasyndaǵy jasyl jelekterdi kútip-ustaý jáne qorǵaý erejesine sáikes, zańsyz kesilgen, joiylǵan nemese sirek jáne joiylý qaýpi bar ósimdikterdiń tizbesine engizilgen jasyl jelekterge qatysty sol túrdegi (qosymsha túrlerin) ósimdikterdiń ornyna júz ese kólemde aǵash otyrǵyzý qarastyrylǵan. QR Qylmystyq kodekstiń 340-baby boiynsha 160 AEK-ke deiin aiyppul, túzeý jumystary, qoǵamdyq jumystarǵa tartý nemese múlikti tárkilei otyryp qamaýǵa alý túrindegi jaýapkershilik kózdelgen.
Aita ketý kerek, Basqarma ýákiletti organ retinde 2006 jylǵy 31 qazandaǵy № 1034 QR Úkimetiniń qaýlysymen bekitilgen «Sirek kezdesetin jáne joiylyp ketý qaýpi bar ósimdikter men janýarlar túrleriniń tizbesine» engizilgen jasyl jelekterdi kesýge ruqsat bermeidi.
Is Almaty qalasynyń politsiia departamenti men Ekologiia jáne qorshaǵan orta basqarmasynyń baqylaýynda.
