Almaty ákimi Darhan Satybaldy jumys sapary barysynda qalanyń negizgi jylýmen qamtý nysandarynyń jaǵdaiymen tanysty. Aralaý kezinde Ońtústik aýdandyq qazandyq, «Orbita» qazandyǵy jáne Áýezov aýdanyndaǵy jylý jelilerin qaita jańǵyrtý aýmaǵy tekserildi, dep habarlaidy dalanews.kz.
Alǵashqy nysan – Qojanov kóshesindegi Ońtústik aýdandyq qazandyq. Ol 1 553 nysandy, onyń ishinde 356 kóppáterli turǵyn úi men 16 bilim berý nysanyn jylýmen qamtamasyz etedi. Qaita jańǵyrtý aiasynda munda úsh qazandyq aýystyrylyp, taǵy bireýi jańartyldy, sondai-aq qosalqy jabdyqtar jańǵyrtyldy. Jobany iske asyrý qazandyqtyń qýatyn saǵatyna 55 Gkal-ǵa arttyryp, shamamen 200 myń tutynýshyny jylýmen qamtýdyń senimdiligin kúsheitýge múmkindik beredi.
Odan keiin Darhan Satybaldy «Orbita» aýdandyq qazandyǵyna bardy. Nysan 1973 jyldan beri jumys isteidi. Qazandyqqa 1 312 nysan qosylǵan, onyń ishinde 925 kóppáterli turǵyn úi, 39 bilim berý jáne 17 densaýlyq saqtaý nysany bar. 2026 jyly munda jóndeý jumystary júrgizildi.
«Basty mindet – eń joǵary júkteme kezinde turǵyndardy turaqty jylýmen qamtamasyz etý. Tozý deńgeii joǵary nysandardy kezeń-kezeńimen jańǵyrtyp, barlyq jumysty sapaly ári belgilengen merzimde oryndaý qajet», – dedi Darhan Satybaldy.
Jumys saparynyń sońǵy núktesi Sain – Momyshuly – Ulyqbek – Abai kósheleri aralyǵyndaǵy jylý jelilerin qaita jańǵyrtý ýchaskesi boldy. Jylý trassasy 1988 jyldan beri paidalanylyp keledi jáne normativtik paidalaný merzimin ótegen. Sońǵy úsh jylda munda 10 zaqymdaný deregi tirkelgen. Qazir nysannyń daiyndyǵy 80%-ǵa jetti, biyl shamamen 120 metr jylý jelisi aýystyryldy. Jańǵyrtý aiaqtalǵannan keiin 45 kóppáterli turǵyn úidiń, 15 ózge nysannyń jáne bir balabaqshanyń jylýmen qamtylý senimdiligi artady.
Nysanda turǵyndarmen kezdesý de ótti. Qala turǵyndary qalalyq infraqurylymǵa qatysty suraǵy men usynysyn aitty. Kezdesý qorytyndysynda tiisti qyzmetterge naqty tapsyrma berildi.
Jalpy, 2026 jyly Almatyda 20,1 shaqyrym jylý jelisin qaita jańǵyrtý jáne jóndeý jumystary júrgizilip jatyr. Onyń 15,8 shaqyrymy aiaqtaldy.
