سوڭعى جىلدارى الماتى قالاسىندا ەكسترەميزمگە قاتىستى قىلمىستاردىڭ سانى ءبىرقالىپتى تومەندەۋ ءۇردىسىن كورسەتۋدە. بۇل تۋرالى الماتى قالاسى ءدىن ىستەرى جونىندەگى باسقارماسى مالىمدەدى، دەپ حابارلايدى Dalanews.kz.

باسقارما مالىمەتىنشە، سوڭعى 3–5 جىل ارالىعىندا الماتىدا ەكسترەميزم بويىنشا تىركەلگەن قۇقىقبۇزۋشىلىقتار سانى تۇراقتى تومەندەپ وتىر. مۇنداي وڭ ديناميكا:

• قۇقىق قورعاۋ ورگاندارىنىڭ كەشەندى الدىن الۋ شارالارى،

• مەملەكەتتىك قۇرىلىمدار مەن قوعامدىق ۇيىمداردىڭ بىرلەسكەن جۇمىسى،

• جاستارمەن جۇرگىزىلەتىن ماقساتتى پروفيلاكتيكانىڭ كۇشەيۋى،

• سيفرلىق مونيتورينگتىڭ جەتىلدىرىلۋى سياقتى فاكتورلاردىڭ ناتيجەسى رەتىندە باعالانىپ وتىر.

راديكالدىق يدەيالار ينتەرنەت ارقىلى تارالادى

قالادا ناقتى ءبىر دەسترۋكتيۆتى اعىمنىڭ باسىم تارالۋى بايقالمايدى. راديكالدىق يدەيالاردىڭ باستى تارالۋ الاڭى – الەۋمەتتىك جەلىلەر مەن جابىق مەسسەندجەرلەر. وسىعان بايلانىستى ءدىن ىستەرى باسقارماسى تاۋلىكتىك ونلاين-مونيتورينگ جۇيەسىن ىسكە قوسقان. ءقاۋىپتى كونتەنت انىقتالعان جاعدايدا، ۋاكىلەتتى ورگاندار دەرەۋ ءتيىستى شارالار قابىلدايدى.

سونىمەن قاتار، جاستار اراسىنداعى ءدىني ساۋاتتىلىقتى ارتتىرۋ – باستى باعىتتاردىڭ ءبىرى. ءبىلىم بەرۋ ورىندارىندا، كوللەدجدەر مەن ۋنيۆەرسيتەتتەردە تۇراقتى تۇردە اقپاراتتىق كەزدەسۋلەر، سەمينارلار مەن ترەنينگتەر ءوتىپ كەلەدى.

الدىن الۋ شارالارى مەملەكەتتىك دەڭگەيدە جۇزەگە اسۋدا

الماتىدا ءدىني ەكسترەميزمنىڭ الدىن الۋ جۇمىستارى بىرنەشە ماڭىزدى مەملەكەتتىك قۇجاتتار اياسىندا اتقارىلىپ جاتىر. سونىڭ ەڭ نەگىزگىسى – 2023–2027 جىلدارعا ارنالعان ءدىني ەكسترەميزمگە قارسى ءىس-قيمىل جونىندەگى مەملەكەتتىك باعدارلاما.

باعدارلاما تومەندەگى باعىتتاردى قامتيدى:

• ءاقپاراتتىق-تۇسىندىرۋ جۇمىستارىن كۇشەيتۋ،

• پروفيلاكتيكامەن اينالىساتىن مامانداردى دايارلاۋ،

• سيفرلىق باقىلاۋ تەتىكتەرىن دامىتۋ،

• حالىقپەن تىكەلەي جۇمىس جۇرگىزۋ.

بۇعان قوسا، الماتى قالاسى اكىمدىگى جىل سايىن قالالىق دەڭگەيدەگى اۋماقتىق جوسپاردى بەكىتەدى. ونىڭ اياسىندا:

• مەكتەپتەردە،

• جوعارى وقۋ ورىندارىندا،

• جۇمىس ورىندارىندا،

• جاستار ۇيىمدارىندا

پروفيلاكتيكالىق ءىس-شارالار ۇيىمداستىرىلادى.

ءاقپاراتتىق-تۇسىندىرۋ توپتارى بەلسەندى جۇمىس ىستەپ كەلەدى

قالا اۋداندارىندا قۇرىلعان ءاقپاراتتىق-تۇسىندىرۋ توپتارى (اتت) تۇرعىندارمەن تىكەلەي كەزدەسۋلەر وتكىزىپ، ءدىني ماسەلەلەر بويىنشا دۇرىس اقپارات تاراتادى. ولار ەڭبەك ۇجىمدارىنا، كوللەدجدەر مەن ۋنيۆەرسيتەت ستۋدەنتتەرىنە، كوپبالالى اتا-انالارعا جانە باسقا دا توپتارعا ارنالعان ارنايى لەكسيالار مەن ترەنينگتەر جۇرگىزەدى.

بۇل توپتاردىڭ جۇمىسى قوعامداعى ءدىني تۇراقتىلىقتى نىعايتۋعا جانە دەسترۋكتيۆتى يدەولوگيانىڭ الدىن الۋعا باعىتتالعان.

الماتىدا ءدىني ەكسترەميزممەن كۇرەس ءبىر عانا قاۋىپسىزدىك شارالارىمەن شەكتەلمەيدى. نەگىزگى باسىمدىق – تۇرعىنداردىڭ ءدىني ساۋاتتىلىعىن ارتتىرۋ، قوعامدى اقپاراتتاندىرۋ جانە راديكالدىق يدەيالاردىڭ الدىن الۋ. مامانداردىڭ ايتۋىنشا، جۇيەلى پروفيلاكتيكا مەن اشىق اقپاراتتىق ساياسات قالاداعى تۇراقتىلىق پەن قاۋىپسىزدىكتى قامتاماسىز ەتۋدىڭ باستى قۇرالى بولىپ وتىر.