الماتىدا ەكسپو-ورتالىق قۇرىلىسى ءۇشىن جەر تەلىمدەرىن ماجبۇرلەپ الۋ باستالدى، دەپ حابارلايدى Dala News.
مالىمەتكە سايكەس، جەر تەلىمدەرىن الۋ تۋرالى قاۋلى 2026 جىلعى 26 ناۋرىزدا قابىلدانعان. قازىرگى ۋاقىتتا اكىمدىك جاڭا نىسان قۇرىلىسىنا دايىندىق جۇمىستارىن جۇرگىزىپ جاتىر.
جوسپار بويىنشا، جەر تەلىمدەرى مەدەۋ اۋدانىندا، قۇلجا تاس جولىنىڭ شىعىسىندا ورنالاسقان اۋماقتان الىنادى. جالپى الىناتىن جەر كولەمى شامامەن 1 گەكتاردى قۇرايدى.
قۇجاتقا سايكەس، ءۇش جەر تەلىمى قاراستىرىلعان:
•قۇلجا تاس جولى، 92 – 0،56 گەكتار؛
•قۇلجا تاس جولى، 70/2 – 0،15 گەكتار؛
•الماتى – قورعاس اۆتوجولى بويىنداعى جەكە تۇلعاعا تيەسىلى جەر – 0،25 گەكتار.
جەر تەلىمدەرىن الۋ ءراسىمىن 2027 جىلعى 31 جەلتوقسانعا دەيىن اياقتاۋ جوسپارلانعان.
اكىمدىك مالىمەتىنشە، جەر يەلەرىنە وتەماقى تولەنەدى. جەر تەلىمدەرى مەن ونداعى قۇرىلىستار نارىقتىق باعامەن باعالانادى.
ەگەر مەنشىك يەلەرى ۇسىنىلعان وتەماقى سوماسىمەن كەلىسپەسە، ماسەلە سوت تارتىبىمەن شەشىلۋى مۇمكىن.
