وتاندىق سيرك ونەرى ۇلكەن جەڭىسكە جەتتى. الماتى سيركىنىڭ ارتيستەرى – باتىر جانۇزاق پەن مارلەن ماراتوۆ ميلاندا وتكەن بەدەلدى «Lo Show Dei Record» حالىقارالىق شوۋىندا رەكورد ورناتىپ، گيننەستىڭ رەكوردتار كىتابىنا ەندى. بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا رەكوردسمەندەردىڭ وزدەرى مالىمدەدى،- دەپ حابارلايدى Dalanews.kz

يتاليادا ولار «باسىنا قولىمەن تىك سۇيەنىپ تۇرعان اداممەن بىرگە ساتىمەن جىلدام ۋاقىتتا كوتەرىلىپ-تۇسۋ» نوميناسياسى بويىنشا بىرەگەي رەكورد ورناتتى. ارتيستەر ەڭ اسەرلى ءارى ءقاۋىپتى تريۋكتى نەبارى 36،66 سەكۋند ىشىندە تاماشا ورىنداپ شىقتى. بۇل جەتىستىك كورەرمەندەردى عانا ەمەس، حالىقارالىق قازىلار القاسىن دا تاڭعالدىردى. ولار الماتىلىق اكروباتتاردىڭ ەرەكشە دايارلىعىنىڭ، ەپتىلىگى مەن شەبەرلىگىن اتاپ ءوتتى.

«بۇل كەرەمەت ءسات بولدى. ءبىز بۇل رەكوردقا ۇزاق ۋاقىت تاباندىلىق تانىتا وتىرىپ دايىندالدىق. ءبۇتىن زالدىڭ قوشەمەتىن كورۋ – ۇمىتىلمايتىن ەرەكشە ءسات بولدى»، — دەدى، رەكورد ورناتقان باتىر جانۇزاق.

ارتيستەر بۇعان دەيىن الەمدىك ساحنادا دا ونەر كورسەتىپ، «America's Got Talent»، «Britain's Got Talent» جانە «China’s Got Talent» سياقتى بەلگىلى شوۋلارعا قاتىسىپ، فينالعا شىعىپ، جۇلدەگەر اتانعان.

«ءبىز ءۇشىن بۇل جاي عانا رەكورد ەمەس، بۇل سيرك ونەرىنە ماحابباتىن، ءومىرىن ارناعان بۇكىل كوماندامىزدىڭ ەڭبەگىنە بەرىلگەن باعا. بىزگە سەنگەن بارلىق جانكۇيەرگە العىسىمىز شەكسىز»، — دەپ تولىقتىردى الماتى سيركىنىڭ ءارتيستى، رەكوردسمەن مارلەن ماراتوۆ.

قازاق مەملەكەتتىك سيركىنىڭ باسشىسى ماقسات جايىقوۆتىڭ ايتۋىنشا، بۇل رەكورد قازاقستاندىق ارتىستەردىڭ دەڭگەيى جوعارى ەكەنىن دالەلدەپ، الماتى سيركىنىڭ حالىقارالىق ارەناداعى بەدەلىن نىعايتۋعا جاسالعان تاعى ءبىر قادام بولدى.

«ءبىز ونەرپازدارىمىزبەن ماقتانامىز. بۇل رەكورد – جەكە جەتىستىك قانا ەمەس، سونىمەن قاتار قازاق سيرك ونەرىنىڭ دامۋىنا قوسىلعان زور ۇلەس. ەندى قازاقستاندا ناعىز سيرك شەبەرلەرى بار ەكەنىن بۇكىل الەم بىلەدى»، — دەدى قازاق مەملەكەتتىك سيركىنىڭ ديرەكتورى ماقسات جايىقوۆ.