الماتى قالاسى اكىمى ەربولات دوسايەۆ قالانىڭ ءۇش جىلدىق بيۋدجەتىنىڭ جوباسى قارالىپ جاتقان ءماسليحاتتىڭ كەزەكتەن تىس سەسسياسى كەزىندە اباتتاندىرۋ پاسپورتتارىن ەنگىزۋ بارىسى تۋرالى ايتتى، – دەپ حابارلايدى Dalanews.kz الماتى قالاسى اكىمىنىڭ باسپا ءسوز قىزمەتىنە سىلتەمە جاساپ.
بۇل قۇجاتتار بيىلعى جىلى قابىلدانعان قالانى اباتتاندىرۋدىڭ جاڭا ەرەجەلەرىندە قاراستىرىلعان.
– مەملەكەت باسشىسىنىڭ باستاماسىمەن «تازا قازاقستان» باعدارلاماسى اياسىندا اكىمدىك سۇيىكتى قالامىزدى اباتتاندىرۋ جانە كوگالداندىرۋ بويىنشا جۇيەلى شارالار قابىلداۋدا. قالانى اباتتاندىرۋ جانە كوگالداندىرۋ – جايلى قالالىق ورتا قۇرۋ جانە الماتىلىقتاردىڭ ءومىر ءسۇرۋ ساپاسىن ارتتىرۋ بويىنشا ءبىزدىڭ باسىمدىعىمىز. اباتتاندىرۋدىڭ جاڭا ساپاسىنا قول جەتكىزۋ جانە جاسىل قوردى كەڭەيتۋ ءۇشىن وسى ماڭىزدى باسىمدىقتاردى قارجىلاندىرۋ 2025 جىلى 40%-عا نەمەسە 50 ملرد تەڭگەگە 170،5 ملرد تەڭگەگە دەيىن ۇلعايادى، – دەدى ەربولات دوسايەۆ.
قالا باسشىسى اعىمداعى جىلدىڭ شىلدە ايىندا اۋماقتاردى اباتتاندىرۋ پاسپورتتارىن ەنگىزۋدى كوزدەيتىن قالانى اباتتاندىرۋ ەرەجەلەرى بەكىتىلگەنىن ەسكە سالدى. پاسپورتتاۋ كاسىپكەرلەر مەن باسقا سۋبەكتىلەردىڭ ىرگەلەس اۋماقتار ءۇشىن جاۋاپكەرشىلىك شەكارالارىن ناقتى انىقتاۋعا مۇمكىندىك بەرەدى.
اباتتاندىرۋ پاسپورتىندا جتق اۋماقتارىن، قۇرىلىس، بالالار جانە سپورت الاڭدارىن، نوسەرلى كارىز جەلىلەرىن، باقشا-ساياباق جيھازدارىن جانە ماف ۇستاۋ ءتارتىبى سيپاتتالعان. عيماراتتار مەن قۇرىلىستاردىڭ يەلەرى قاسبەتتەردى ۋاقتىلى جوندەۋدى جانە سىرلاۋدى قوسا العاندا، ولاردى ءتيىستى كۇتىپ ۇستاۋ مەن پايدالانۋدى قامتاماسىز ەتۋگە مىندەتتى. سونىمەن قاتار، قاسبەتتەر مەن اۋماقتاردىڭ ەستەتيكالىق جانە سانيتارلىق جاعدايىنىڭ دۇرىس زاستىگى ءۇشىن مەنشىك يەلەرىنىڭ اكىمشىلىك جاۋاپكەرشىلىگى بەكىتىلگەن.
پاسپورتتاۋ پروسەسى ءۇش كەزەڭگە بولىنەدى. ءبىرىنشى كەزەڭدە ماگيسترالدىق كوشەلەردە، قالالىق ماڭىزى بار ايماقتاردا جانە جاياۋ جۇرگىنشىلەر كەڭىستىگىندە مىڭنان استام نىسان قامتىلدى. ەكىنشى كەزەڭدە اۋداندىق ماڭىزى بار كوشەلەرگە نازار اۋدارىلادى، ال سوڭعى كەزەڭ جەرگىلىكتى ماڭىزى بار كوشەلەر مەن اۋلاىشىلىك اۋماقتاردى قامتيدى.
بۇل قۇجات 2 مىڭعا جۋىق كاسىپكەرلىك نىسانى ءۇشىن رەسىمدەلدى جانە 2025 جىلدىڭ 1 ساۋىرىنە دەيىن 6 039 نىساندى قامتي وتىرىپ، پاسپورتتاۋدى تولىق اياقتاۋ كەزەڭ-كەزەڭمەن قامتاماسىز ەتىلەتىن بولادى.
