ءبىلىم كۇنى الماتىدا 323 مەكتەپ ەسىگىن ايقارا اشتى، ونىڭ 215ء-ى مەملەكەتتىك، 108ء-ى جەكەمەنشىك مەكتەپ. بيىل تۇركسىب اۋدانىنداعى «قايرات» ىقشاماۋدانىنداعى №211 جاڭا مەملەكەتتىك مەكتەپ وقۋشىلاردى قابىلداسا، قالا بويىنشا 3000 ورىندىق 9 جەكەمەنشىك مەكتەپ تە جۇمىسىن باستاعانىن ايتا كەتۋىمىز كەرەك.
– جاڭادان اشىلعان 1200 ورىندى مەكتەپ زاماناۋي قۇرال-جابدىقتارمەن جابدىقتالعان. حيميا، بيولوگيا، فيزيكا پاندەرى بويىنشا ءتورت كابينەت، سونىمەن قاتار التى ينفورماتيكا كابينەتى بار. تەحنولوگياعا ارنالعان كابينەتتەر دە بار – قىزدار مەن ۇلدار ءۇشىن بولەك. جەكە مەدياتەكا، 280 ورىندىق اسحانا، اكت زالىمەن بىرىكتىرىلگەن سپورت زالى بار. مەكتەپ ءبىر اۋىسىمدا 1500 بالاعا ءبىلىم بەرە الادى. ءقازىر ءبىلىم ورداسىنا 1500-دەن استام بالا قابىلداندى، ال ءبىرىنشى سىنىپقا بارعان بالانى 285ء-تى قۇرايدى، – دەدى الماتى قالاسى ءبىلىم باسقارماسىنىڭ باسشىسى ءلاززات جىلقىبايەۆا.
بۇگىندە قالاداعى №48 مەكتەپ-ليسەيى مەن №9 مەكتەپ-ليسەيگە جاپسارلانا سالىنعان قوسىمشا نىسانداردىڭ قۇرىلىسى اياقتالىپ، ءبىلىم الاتىن وقۋشىلاردىڭ سانىن 420 ورىنعا ارتتىرۋعا مۇمكىندىك تۋعانىن دا ايتا كەتۋىمىز كەرەك. ءبىلىم باسقارماسى جىل سوڭىنا دەيىن №148 مەكتەپ-گيمنازيانىڭ سىيىمدىلىعىن 300 ورىنعا كەڭەيتۋ جوسپارلاپ وتىر. بۇگىندە الماتى قالاسىنداعى ءبىلىم بەرۋ ۇيىمدارىندا 301 مىڭنان استام وقۋشى ءبىلىم الۋدا.
بيىل الماتى اكىمى ەربولات دوسايەۆتىڭ تاپسىرماسى بويىنشا باستاۋىش سىنىپ 133 مىڭنان استام وقۋشىسى تەگىن ىستىق تاماقپەن قامتىلادى.
![](/uploads/images/20240127153519538.jpg)
سونىمەن قاتار، جاڭا وقۋ جىلىندا اكىمنىڭ تاپسىرماسىمەن الماتىدا العاش رەت مەكتەپ جاسىنداعى بالالاردى تۇرعىلىقتى جەرىنەن ءبىلىم وشاعىنا دەيىن تەگىن تاسىمالداۋ ءىسى جولعا قويىلدى.
«مەكتەپ اۆتوبۋسى» جوباسى مەكتەپتەن قاشىقتا تۇراتىن كىشى مەكتەپ وقۋشىلارى مەن ستۋدەنتتەرگە باعىتتالعان. اۆتوبۋستار 30 مەملەكەتتىك مەكتەپتى قامتىپ وتىر.
الماتى قالاسىنىڭ اۆتوپاركى ءبىلىم باسقارماسىمەن بىرلەسىپ 100 مەكتەپ اۆتوبۋسىن ساتىپ العان. سۋ جاڭا اۆتوبۋستار حالىقارالىق قاۋىپسىزدىك ستاندارتتارى مەن تەحنيكالىق تالاپتارعا تولىقتاي سايكەس كەلەدى. قوعامدىق كولىكتىڭ اپاتتىق شىعۋ، قاۋىپسىزدىك بەلدىكتەرى، مۇمكىندىگى شەكتەۋلى بالالارعا ارنالعان پاندۋس، ءورت قاۋىپسىزدىگى جۇيەسى ورناتىلعان.
بالالاردى تاسىمالداۋ ىلەسپە پەداگوگتىڭ قاتىسۋىمەن جانە بالالاردى تاسىمالداۋدىڭ ازىرلەنگەن ەرەجەلەرىنە سايكەس جۇزەگە اسىرىلادى.