قازاقستان دەلەگاسياسىنىڭ قۇرامىندا وبلىس اكىمدىگىنىڭ، ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ، «الماتى وبلىسىن دامىتۋ بويىنشا «الاتاۋ» اق، وبلىستىڭ كاسىپكەرلىك ۇيىمدارى وكىلدەرى جانە «جەتىسۋ» اكك» ۇلتتىق كومپانياسىنىڭ باسشىلىعى دا بار.
ساپار كانتونمەن ساۋدا-ەكونوميكالىق، قارجى جانە عىلىمي-تەحنيكالىق ىنتىماقتاستىق ورناتۋدى، قازاقستانداعى بيزنەس جۇرگىزۋدىڭ جەڭىلدەتىلگەن شارتتارىمەن تانىستىرۋدى، سونداي-اق، كەلەشەك ىنتىماقتاستىقتى كەڭەيتۋ مەن جاڭا سالالاردى بىرلەسىپ تابۋدى ماقسات ەتتى.
قازاقستاننىڭ شۆەيسارياداعى ەلشىلىگىنىڭ حابارلاۋىنشا، الماتى وبلىسىنىڭ اكىمى ا.باتالوۆتىڭ تيچينو كانتونىنىڭ پرەزيدەنتى مانۋەلە بەرتوليمەن، مەملەكەتتىك كانسلەر ارنولدو كودۋريمەن، ەكونوميكا جانە قارجى ءمينيسترى كريستيان ۆيتتامەن، لۋگانو قالاسىنىڭ اكىمى ماركو بوررادوريمەن، تيچينو كانتونى بانكىنىڭ ديرەكتورلار كەڭەسىنىڭ ءتوراعاسى فابريسيو چيسلاكۆيچپەن، قولدانبالى عىلىم مەن ونەر وڭتۇستىك شۆەيساريانىڭ ۋنيۆەرسيتەتىنىڭ (SUPSI) يننوۆاسيا مەن زەرتتەۋ دەپارتامەنتىنىڭ ورىنباسارى جانباتيستو راۆانومەن جانە 20-دان استام شۆەيساريالىق كومپانيالار باسشىلارىمەن كەزدەسۋلەرى ءوتتى. الماتى وبلىسى دەلەگاسياسىنىڭ مۇشەلەرى تيچينو كانتونىنداعى قوقىستى قايتا وڭدەۋ بويىنشا ەڭ ءىرى كاسىپورىن «Azienda Cantonale die Rifiuti»، شوكولاد وندىرەتىن «Chocolat Stella»، ەنەرگەتيكا جانە اقپاراتتىق تەحنولوگيالار بويىنشا «اۆۆ» كومپانيالارىمەن، سونداي-اق ايرولو قالاسىندا تاۋ شاڭعىسى كۋرورتى، اسىل تۇقىمدى سيىر شارۋاشىلىعى جانە ىرىمشىك پەن ءسۇت ونىمدەرىن شىعاراتىن زاۋىتتاردىڭ جۇمىسىمەن تانىستى.
«Azienda Cantonale die Rifiuti» - تيچينو كانتونىنىڭ قالدىقتاردى تەرەڭ وڭدەيتىن ەڭ ءىرى زاۋىتى، تاۋلىگىنە 100 توننا قالدىقتى وڭدەپ، 10 مۆت ەنەرگيا مەن 2 مۆت-تان استام جىلۋ قۋاتىن وندىرەتىنىن اتاپ ءوتۋ قاجەت.
تيچينو كانتونى باسشىلىعىمەن كەلىسسوزدەر بارىسىندا ساۋدا-ەكونوميكالىق، ءبىلىم، عىلىم، تۋريزم، اۋىل شارۋاشىلىعى جانە قارجى ماسەلەلەرىندە ىنتىماقتاستىقتى نىعايتۋ جايى تالقىلاندى. كانتوننىڭ پرەزيدەنتى مانۋەلە بەرتولي الماتى وبلىسى مەن تيچينو كانتونىنىڭ ەكىجاقتى ىنتىماقتاستىق ءۇشىن ۇلكەن الەۋەتى بار ەكەندىگىنە جانە بۇل ساپار ونىڭ ءىس جۇزىندە جۇزەگە اسىرىلۋىنا ىقپال ەتەتىنىنە ەرەكشە كوڭىل اۋداردى.
قازاقستاننىڭ دۇنيەجۇزىلىك ساۋدا ۇيىمىنىڭ جانە ەۋرازيالىق ەكونوميكالىق وداعىنىڭ مۇشەسى بولۋىنا تيىمدىلىگى، ەلىمىزدەگى كەڭ ينۆەستيسيالىق پرەفەرەنسيالار جانە بيزنەس جۇرگىزۋ ءۇشىن جەڭىلدەتىلگەن شارتتارى شۆەيساريا ىسكەر توپتارىنىڭ اراسىندا ەرەكشە قىزىعۋشىلىق تۋدىردى.
وتكىزىلگەن كەزدەسۋلەردىڭ ناتيجەسىندە تاراپتار الماتى وبلىسىنداعى ينۆەستيسيالىق جوبالاردى جۇزەگە اسىرۋ مۇمكىندىگىن زەرتتەۋگە، تاجىريبە الماسۋعا، اسىرەسە وڭتۇستىك شۆەيساريانىڭ قولدانبالى عىلىمدار جانە ونەر ۋنيۆەرسيتەتىمەن (SUPSI) ءبىلىم جانە عىلىم سالاسىندا ىنتىماقتاستىقتى نىعايتۋعا قول جەتكىزدى. قازاقستان تاراپى كانتون باسشىلىعىمەن جەرگىلىكتى ىسكەر توپتارىن الماتى وبلىسىنا ىسساپارمەن كەلۋگە شاقىردى.
تيچينو كانتونى - شۆەيساريانىڭ ءىرى قارجى ورتالىقتارىنىڭ ءبىرى، سونداي-اق مۇندا اقپاراتتىق-كوممۋنيكاسيالىق تەحنولوگيالار، ءبىلىم، تۋريزم، قۇرىلىس، ءماشينا جابدىقتارى، فارماسيەۆتيكا مەن بيومەديسينا سالالارى دامىعان. ءجىو 28،6 ملرد. اقش دولل.، حالىقتىڭ جان باسىنا شاققاندا ءجىو 82،1 مىڭ اقش دولل.، ال شۆەيساريانىڭ جىو-گە ۇلەسى 4،5% قۇرايدى.
الماتى وبلىسى اكىمدىگىنىڭ ءباسپاسو قىزمەتى
