شارا بارىسىندا 50 ادامنان قۇرالعان توپ تەڭىز دەڭگەيىنەن 3682 مەتر بيىكتىكتە ورنالاسقان ۇلكەن الماتى شىڭىنا كوتەرىلدى.
شارا ماقساتى – جاستار اراسىندا سالاۋاتتى ءومىر سالتىن ناسيحاتتاۋ، جات مىنەزدەردىڭ الدىن الۋ، قىزمەتكەرلەردىڭ سپورتتىق شەبەرلىكتەرىن جانە جان – جاقتى دايىندىقتارىن ارتتىرا وتىرىپ، ەلىمىزدەگى ءتۋريزمدى دامىتۋ.
– «جەتىسۋ ادالدىق الاڭى» جوبالىق كەڭسەسىنىڭ باستاماسىمەن ۇيىمداستىرىلعان شاراعا ءاربىر جاس بەلسەنە اتسالىسۋدا. بۇل ورتاشا تاۋدىڭ جوتالارىنا شىقساڭىز تابيعاتتىڭ شەبەرلىگىنە تاڭعالاسىز. كوك كۇمبەزەگە تالاسا بوي كوتەرگەن زەڭگىر تاۋلار، تاۋ-تاستى جارىپ اققان بۇلاقتار، جىلعالار، قالىڭ قاراعاي، شىرشا، اققايىڭ ارالاس ورمان، ءبارى-بارى تاماشا. وسىنىڭ ءبارىن ءوز كوزىڭمەن كورۋ ءبىر باقىت، – دەيدى الماتى وبلىستىق دەپارتامەنتىنىڭ باسشىسى دانيار تۇرعانبايەۆ.
بيىكتىكتى باعىندىرۋدا العاشقىلاردىڭ ءبىرى بولىپ جەتكەن سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتىنىڭ قىزمەتكەرى نازەركە كۋرجيكبايەۆا شىڭعا شىققانداعى وي-سەزىمىن، كوڭىل كۇيىن ءبىلدىردى.
– مەن مۇنداي بيىكتىكتى ومىردە باعىندىرامىن دەپ ويلاماپپىن. تاڭ سارىدەن جولعا شىعىپ، تاۋعا قاراي ءتۇرلى اينالمالى جۇرىستەگى جولدارمەن جۇردىك. جولدىڭ تىم اۋىر ەكەندىگىن بايقادىق. دەگەنمەن تاۋدىڭ ادامدى تارتاتىن ءبىر قاسيەتى بار سەكىلدى. قانشا الىس ءارى تىم بيىكتە بولسا دا، بيىككە ورلەۋدەن ىشتەي تارتىنبادىق. سونىڭ ناتيجەسى بولسا كەرەك، 3600 مەتر بيىكتىككە جەتۋدىڭ باقىتى بۇيىرىپتى. مۇندا ءوزىڭدى ءبىر ەرەكشە سەزىنەدى ەكەنسىڭ. نەگىزى، تاۋدىڭ ءبىر ەرەكشەلىگى بار. مۇندا وتتەگىنىڭ جەتىسپەۋشىلىگى انىق بايقالدى. ءارى اعزاعا اۋىرتپاشىلىق تۇسىرەدى. ءتىپتى تەمپەراتۋرانىڭ ءوزى تومەندەۋ. مەن ءۇشىن ومىردە تاۋداعى وسى ساپار ۇمىتىلماس ەستەلىكتەر بولىپ قالماق.
