م.تۇيمەبايەۆ اۋىلىنىڭ تۇرعىنى جەڭىسگۇل داۋلەتوۆا ءوزىنىڭ تاباندىلىعى مەن ەرەكشە شەبەرلىگىنىڭ ارقاسىندا «AMANAT» پارتياسىنىڭ قولداۋىمەن قازاقستان مۇگەدەكتەر كونفەدەراسياسى ۇيىمداستىرعان «جان شۋاق» قوعامدىق سىيلىعىنىڭ لاۋرەاتى اتاندى. ول «كاسىپكەرلىك قىزمەتتى دامىتۋعا قوسقان ۇلەسى ءۇشىن» نوميناسياسىندا جەڭىمپاز دەپ تانىلدى، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
2003 جىلى اۋىر جول اپاتىنان كەيىن ارباعا تاڭىلعان جەڭىسگۇل داۋلەتوۆا ءوز كاسىبىن دوڭگەلەتىپ، ۇلتتىق قولونەردى دامىتۋعا بار كۇشىن سالىپ كەلەدى. العاشىندا حوببي رەتىندە باستالعان ءىسى بۇگىندە ونى حالىقارالىق دەڭگەيدەگى قولونەر شەبەرى دارەجەسىنە جەتكىزدى.
كاسىپكەر ۇلتتىق كيىمدەر، باس كيىمدەر، اياق كيىمدەر مەن ءجۇن ونىمدەرىنەن جاسالاتىن بۇيىمدارىن ەل ىشىندە عانا ەمەس، شەتەلدىك كورمەلەردە دە تانىتىپ ءجۇر. 2023 جىلى ول «ءبىر اۋىل – ءبىر ءونىم» رەسپۋبليكالىق جوباسىنىڭ ءفيناليسى اتانىپ، الماتى وبلىسىنىڭ ۇزدىك كاسىپكەرلەرى قاتارىنا قوسىلدى.
ول 20 جىل بويى كوپتەگەن حالىقارالىق كورمەلەر مەن فورۋمدارعا قاتىسىپ، قوعامدا بەلسەندى ازاماتتىق ۇستانىمىن كورسەتىپ كەلەدى. جەڭىسگۇل داۋلەتوۆا ىلە اۋدانىنداعى ىسكەر ايەلدەر كەڭەسىنىڭ ءتوراعا ورىنباسارى جانە قوعامدىق جۇمىستاردىڭ بەلسەندى مۇشەسى رەتىندە دە تانىمال.
