الماتى وبلىسى قاراساي اۋدانىنداعى جىبەك جولى اۋىلىندا ورنالاسقان ۇن ونىمدەرىن شىعاراتىن سەحتا بولعان جارىلىستان زارداپ شەككەندەردىڭ بارلىعى اۋرۋحانادا كوز جۇمدى. بۇل تۋرالى كومپانيانىڭ رەسمي Instagram پاراقشاسىندا حابارلاندى، دەپ حابارلايدى Dalanews.kz.
ايتا كەتەيىك، توتەنشە جاعداي 23 مامىردا بولعان. ول كەزدە ءبىر ادامنىڭ قازا تاۋىپ، تورتەۋى اۋىر جاراقاتپەن جانساقتاۋ بولىمىنە تۇسكەنى ايتىلعان. زارداپ شەككەندەردىڭ دەنەسىنىڭ 80–90 پايىزى كۇيىپ قالعان ەدى.
28 مامىر كۇنى ولاردىڭ بارلىعى العان جاراقاتتارىنان قايتىس بولعانى بەلگىلى بولدى.
– بۇل قايعىلى وقيعا سالدارىنان ارىپتەستەرىمىزدىڭ قازا تاپقانىن زور كۇيزەلىسپەن حابارلايمىز، – دەلىنگەن كومپانيا مالىمدەمەسىندە.
كومپانيا باسشىلىعى مارقۇمداردىڭ تۋىستارىنا كوڭىل ايتىپ، زاڭ مەن ىشكى كورپوراتيۆتىك باعدارلامالار اياسىندا قاراستىرىلعان ساقتاندىرۋ تولەمدەرىنە قوسىمشا رەتىندە قوسىمشا ماتەريالدىق كومەك كورسەتىلەتىنىن مالىمدەدى.
– جەرلەۋ ءراسىمىن ۇيىمداستىرۋعا قاتىستى بارلىق شىعىندى ءوز موينىمىزعا الامىز. سونىمەن قاتار مارقۇمداردىڭ بولۋى مۇمكىن قارىزدارىن تولىق وتەۋدى قامتاماسىز ەتەمىز، – دەپ اتاپ ءوتتى كومپانيا وكىلدەرى.
«ازيااگروفۋد» اكسيونەرلىك قوعامىنىڭ مالىمەتىنشە، قازىرگى ۋاقىتتا وقيعانىڭ ناقتى سەبەبى بويىنشا تەرگەۋ جۇرگىزىلىپ جاتىر.
