Almaty oblysy Qarasai aýdanyndaǵy Jibek joly aýylynda ornalasqan un ónimderin shyǵaratyn tsehta bolǵan jarylystan zardap shekkenderdiń barlyǵy aýrýhanada kóz jumdy. Bul týraly kompaniianyń resmi Instagram paraqshasynda habarlandy, dep habarlaidy Dalanews.kz.
Aita keteiik, tótenshe jaǵdai 23 mamyrda bolǵan. Ol kezde bir adamnyń qaza taýyp, tórteýi aýyr jaraqatpen jansaqtaý bólimine túskeni aitylǵan. Zardap shekkenderdiń denesiniń 80–90 paiyzy kúiip qalǵan edi.
28 mamyr kúni olardyń barlyǵy alǵan jaraqattarynan qaitys bolǵany belgili boldy.
– Bul qaiǵyly oqiǵa saldarynan áriptesterimizdiń qaza tapqanyn zor kúizelispen habarlaimyz, – delingen kompaniia málimdemesinde.
Kompaniia basshylyǵy marqumdardyń týystaryna kóńil aityp, zań men ishki korporativtik baǵdarlamalar aiasynda qarastyrylǵan saqtandyrý tólemderine qosymsha retinde qosymsha materialdyq kómek kórsetiletinin málimdedi.
– Jerleý rásimin uiymdastyrýǵa qatysty barlyq shyǵyndy óz moinymyzǵa alamyz. Sonymen qatar marqumdardyń bolýy múmkin qaryzdaryn tolyq óteýdi qamtamasyz etemiz, – dep atap ótti kompaniia ókilderi.
«AziiaAgroFýd» aktsionerlik qoǵamynyń málimetinshe, qazirgi ýaqytta oqiǵanyń naqty sebebi boiynsha tergeý júrgizilip jatyr.
