الماتى وبلىسىندا ۇشەمدى دۇنيەگە اكەلگەن وتباسى باسپانالى بولدى

Dalanews 22 جەلت. 2016 02:34 461

الماتى وبلىسىندا ۇشەمدى دۇنيەگە اكەلگەن وتباسى باسپانالى بولدى، دەپ حابارلايدى «قازاقپارات» حاا ءتىلشىسى.

جامبىل اۋدىنىندا اينۇر، گۇلنۇر، بالنۇر ەسىمدى ۇشەمنىڭ اتا-اناسىنا ءۇش بولمەلى پاتەردىڭ كىلتى تابىس ەتىلدى. «بيىل ناۋرىز ايىندا اۋدانىمىزدىڭ تۇرعىنى ۇشەمدى ومىرگە اكەلىپ، سونى قۇتتىقتاپ بارعان كەزدە تۇرعىن ءۇي ماسەلەسىن شەشۋدى ۋادە ەتكەن بولاتىنبىز. سونى ءبىزدىڭ كاسىپكەرلەرىمىز قولداپ، تاۋەلسىزدىگىمىزدىڭ 25 جىلدىعىندا پاتەر كىلتىن تاپسىرىپ وتىرمىز»، - دەيدى جامبىل اۋدانىنىڭ اكىمى جانداربەك دالابايەۆ.

بۇعان دەيىن ءار جەردە پاتەر جالداپ كۇنەلتكەن ابىلەشوۆتار وتباسىنا دەمەۋشىلەر تەلەديدار مەن كىر جۋاتىن ماشينا سىيلادى. بەس قىزدىڭ اناسى جانيپا ابىلەشوۆا جانى جومارت جاندارعا العىسىن ءبىلدىرىپ، الداعى ۋاقىتتا ەلىمىزدىڭ دەموگرافيالىق وسۋىنە ءوز ۇلەسىن قوسا بەرەتىنىن جەتكىزدى.

سامال قابىشيەۆا

 

ۇسىنىلعان
سوڭعى جاڭالىقتار