ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» باعدارلاماسىنىڭ مەرزىمى اياقتالعانىمەن ۇلتتىق جوبا ارقىلى سول باعىتتاعى جۇمىستار جالعاسىن تابۋدا.
يگىلىكتى جوبانىڭ جۇرتقا بەرەرى مول. تالايدى تاۋقىمەتتەن ارىلتىپ، كوپشىلىككە كولدەي ءناسىپ تابۋىنا ىقپال ەتكەن باستاما الماتى وبلىسىندا قارقىندى تۇردە جۇزەگە اسۋدا.
ۇلتتىق جوبانىڭ ۇلتتىق پايداسىن وبلىس تۇرعىندارىنا كورسەتۋ ءۇشىن 6،5 ملرد تەڭگە ءبولۋ كوزدەلگەن ەدى. ونىڭ 1409،3 ملن تەڭگەسى رەسپۋبليكالىق بيۋدجەتتەن بولسا، قالعان 4199،0 ملن تەڭگەسى ۇلتتىق قوردىڭ ەسەبىنەن بەرىلسە، 886،4 ملن تەڭگە جەرگىلىكتى بيۋدجەت قاراجاتى ەسەبىنەن قاراستىرىلىپ وتىر.
ءناسىپتى ايىرۋدىڭ وڭتايلى جولى – كاسىپ. ۇلتتىق جوبادا ءدال وسى قىسقا مەرزىمدى كاسىپتىك وقىتۋعا ايرىقشا كوڭىل بولىنۋدە. الماتى وبلىسىندا ورتا جاستاعى 1280 ادام 1 ايدان 6 ايعا دەيىنگى مەرزىمدە كاسىپتىك وقۋ وقيدى دەپ جوسپارلانعان. بۇل ءۇشىن قازىنادان 331،2 ملن تەڭگە قاراستىرىلىپ وتىر.
سونىمەن قاتار، وتاۋىن ءوز الدىنا قۇرىپ، جەكە كاسىپكە تۇبەگەيلى بەت بۇرۋعا نيەتتەنگەن ازاماتتارعا 1031 گرانت ءبولۋ كوزدەلگەن. گرانت ءۇشىن بەلگىلەنگەن اقشانىڭ جالپى سوماسى 1036،9 ملن تەڭگەنى قۇرايدى.
جۇمىسسىزدىق بەلەڭ العان زاماندا مەملەكەت حالىقتى تۇراقتى جانە ۋاقىتشا جۇمىسپەن قامتۋدى جولعا قويعانى بارشاعا ايان. وسى رەتتە ايتا كەتەيىك، بيىلعى جىلى الماتى وبلىسىندا 6986 ادامدى ۋاقىتشا جۇمىسپەن قامتۋ جوسپارلانعان.
ونىڭ ىشىندە، 556-ى الەۋمەتتىك جۇمىس ورىندارىنا تارتىلاتىن بولسا، 7 ادام مۇگەدەكتەردى جۇمىسقا ورنالاستىرۋ ءۇشىن ارناۋلى الەۋمەتتىك جۇمىس ورىندارىنا جونەلتىلمەك. سونداي-اق، جاستار تاجىريبەسىنە – 765 تۇلەك، قوعامدىق جۇمىستارعا – 5170، العاشقى جۇمىس ورنىنا – 127، ۇرپاقتار كەلىسىمشارتىنا – 36، «كۇمىس جاس» جوباسىنا – 325 تۇرعىن جىبەرىلەدى دەپ كۇتىلۋدە.
ەستەرىڭىزگە سالامىز، اعىمداعى جىلدىڭ 1 شىلدەسىنە جۇمىسپەن قامتۋعا جاردەمدەسۋدىڭ بەلسەندى شارالارىمەن 14 925 ادام قامتىلدى، 12 572 ادام جۇمىسقا ورنالاستىرىلدى، ونىڭ ىشىندە 5246 ادام تۇراقتى جۇمىسقا تۇردى.
قىسقا مەرزىمدى كاسىپتىك وقىتۋعا – 559 ادام، جاستار پراكتيكاسىنا – 366، الەۋمەتتىك جۇمىس ورىندارىنا – 578، قوعامدىق جۇمىستارعا – 4448، العاشقى جۇمىس ورنىنا – 107، ۇرپاقتار كەلىسىمشارتىنا – 16، «كۇمىس جاسقا» – 117 ادام، 100 ادامعا گرانت بەرىلىپ، مۇگەدەكتەردى جۇمىسقا ورنالاستىرۋ ءۇشىن ارناۋلى الەۋمەتتىك جۇمىس ورىندارى 7 ادام جولداندى.
وسىلايشا، وڭىردەگى ەڭبەككە قابىلەتتى حالىقتىڭ كوپشىلىگى جۇمىسپەن قامتۋدىڭ شاراپاتىن كورگەن جايى بار. الداعى تاڭدا كوزدەلگەن مەجەلەر تولىقتاي ورىندالارى حاق.
