الماتى وبلىسىندا پوليسەيلەردى بالاعاتتاعاندارعا قاتىستى قىلمىستىق ءىس قوزعالاتىن بولدى

ساعىنىش سارداروۆا 24 مام. 2024 14:34 2850

الماتى وبلىسىندا پوليسەيلەردى بالاعاتتاعان كۇدىكتىلەرگە قاتىستى قىلمىستىق ءىس قوزعالدى، – دەپ حابارلايدى Dalanews.kz.

ءىىم باسپا ءسوز قىزمەتى مالىمەتىنشە، تالعار اۋدانىنىڭ پوليسەيلەرى قىزمەتتىك مىندەتىن اتقارۋ كەزىندە بيلىك وكىلىن قورلاۋ دەرەگى بويىنشا قىلمىستىق ءىستى تىركەدى. اۋدان ورتالىعى قالا ماڭىنداعى ساياجايلاردىڭ بىرىنە شۋ مەن ايقايعا الاڭداعان جەرگىلىكتى تۇرعىنداردىڭ شاقىرۋىنا ۋچاسكەلىك پوليسيا ينسپەكتورى كەلگەن. ءوز مىندەتىن اتقارىپ جاتقاندا قۇقىقبۇزۋشىلار ءتارتىپ ساقشىسىن بالاعاتتاعان.

كۋاگەرلەردىڭ ايتۋىنشا، ەر ازاماتتار وزدەرىن اگرەسسيۆتى ۇستاپ، قۇقىق قورعاۋ ورگاندارىنىڭ قىزمەتكەرىنە دورەكى سويلەگەن. كومەككە كەلگەن پاترۋلدىك ەكيپاج كۇدىكتىلەردى جەدەل ۇستاپ الىپ، پوليسيا بولىمشەسىنە جەتكىزگەن.

ءقازىر تەرگەۋ جالعاسىپ، بولعان وقيعانىڭ ءمان-جايى انىقتالىپ جاتىر. ءتارتىپ ساقشىلارى ازاماتتاردى قوعامدىق ءتارتىپتى ساقتاۋعا جانە ازاماتتاردىڭ قاۋىپسىزدىگىن قامتاماسىز ەتەتىن قۇقىق قورعاۋ ورگاندارىنىڭ وكىلدەرىنە قۇرمەتپەن قاراۋعا شاقىرادى.

بيلىك وكىلىن قورلاۋ – ايىپپۇلدار، تۇزەتۋ جۇمىستارى نەمەسە باس بوستاندىعىنان ايىرۋ جازاسى قاراستىرىلعان اۋىر قۇقىقبۇزۋشىلىق ساناتىنا جاتادى.


ۇسىنىلعان
سوڭعى جاڭالىقتار