الداعى ەكى جىل ىشىندە الماتى وبلىسىندا قىتايدىڭ YTO Express كومپانياسى ورتالىق ازياداعى ەڭ ءىرى مۋلتيمودالدى لوگيستيكالىق حابتى سالۋدى جوسپارلاپ وتىر. جاڭا ورتالىق كومپانيانىڭ بىرىككەن اراب امىرلىكتەرى، ۆەنگريا، تايلاند، برازيليا، ەفيوپيا جانە امەريكا قۇراما شتاتتارىنداعى حابتارىن قامتيتىن جاھاندىق كولىك جەلىسىنىڭ ءبىر بولىگىنە اينالادى، – دەپ حابارلايدى Dalanews.kz.
جوبانىڭ تانىستىرىلىمى الماتى وبلىسىنىڭ اكىمى مارات سۇلتانعازييەۆ پەن YTO Express باسقارما ءتوراعاسى يۋي ۆەيسزياو مىرزانىڭ كەزدەسۋى بارىسىندا ءوتتى. كەزدەسۋ اياسىندا تاراپتار ىنتىماقتاستىقتىڭ بولاشاعىن جانە جاڭا حابتىڭ نەگىزگى پارامەترلەرىن تالقىلادى. اتالعان جوبا ءوڭىردىڭ لوگيستيكالىق ينفراقۇرىلىمىن تۇبەگەيلى وزگەرتىپ، تاۋار جەتكىزۋ ۇدەرىسىن جەدەلدەتۋگە ىقپال ەتپەك.
وبلىس اكىمى مارات سۇلتانعازييەۆ جوبانىڭ ەلىمىز ءۇشىن ستراتەگيالىق ماڭىزىن اتاپ ءوتتى.
– لوگيستيكالىق حابتىڭ قۇرىلىسى – تەك الماتى وبلىسى ەمەس، بۇكىل قازاقستان ءۇشىن ماڭىزدى باستاما. بۇل ءوڭىردىڭ جۇك وڭدەۋ، سۇرىپتاۋ جانە جەتكىزۋ مۇمكىندىكتەرىن كەڭەيتىپ، ەكونوميكالىق الەۋەتىن ارتتىرادى. ءبىز وسىنداي اۋقىمدى جوبانىڭ ءساتتى جۇزەگە اسۋىنا بارىنشا قولداۋ كورسەتۋگە دايىنبىز، – دەدى ءوڭىر باسشىسى.
جوبا ءوزىنىڭ اۋقىمى مەن جۇزەگە اسىرۋ دەڭگەيى بويىنشا ەرەكشە نازار اۋدارادى. مىسالى، كومپانيانىڭ قىتايدىڭ سزياسين قالاسىنداعى باستى لوگيستيكالىق ورتالىعى شامامەن 100 گەكتار اۋماقتى الىپ جاتىر جانە 100 جۇك ۇشاعىن قابىلداي الادى. كومپانيانىڭ جىلدىق جۇك اينالىمى 2،5 ميلليون توننا دەڭگەيىندە بولماق. جوسپار بويىنشا، 2026 جىلعا دەيىن جاھاندىق جەتكىزۋ جەلىسى تولىق قالىپتاسىپ، وعان قازاقستانداعى حاب تا قوسىلادى.
YTO Express – قىتايداعى ەكسپرەسس جەتكىزۋ سالاسىنداعى جەتەكشى لوگيستيكالىق كومپانيالاردىڭ ءبىرى. قازىرگى تاڭدا كومپانيادا 500 مىڭنان استام قىزمەتكەر جۇمىس ىستەيدى. سونداي-اق، كومپانيانىڭ يەلىگىندە 19 جۇك ۇشاعىنان تۇراتىن جەكە اۋە فلوتى مەن بىرنەشە مىڭداعان جۇك كولىگىنەن تۇراتىن اۆتوپارك بار. بۇل فاكتورلار YTO Expressء-تىڭ بۇكىل الەم بويىنشا لوگيستيكالىق قىزمەتتەردى جوعارى جىلدامدىقپەن جانە سەنىمدى تۇردە كورسەتۋىنە مۇمكىندىك بەرەدى.
كومپانيا باسقارما ءتوراعاسى يۋي ۆەيسزياو قازاقستان تاراپىنان كورسەتىلگەن قولداۋ ءۇشىن ريزاشىلىعىن ءبىلدىردى.
– جوبانى جۇزەگە اسىرۋدىڭ العاشقى كەزەڭىنەن باستاپ ءبىز قازاقستاننىڭ ءتيىستى مينيسترلىكتەرى مەن الماتى وبلىسى اكىمدىگىنەن ۇلكەن قولداۋ الدىق. ءبىز بۇل جوبانىڭ ماڭىزىن جاقسى تۇسىنەمىز جانە ورتالىق ازياداعى حابتى بارىنشا قىسقا مەرزىمدە ىسكە قوسۋعا تىرىسامىز. جوبانىڭ كۇردەلىلىگىنە قاراماستان، ءبىز ونى 2–3 جىل ىشىندە ءساتتى اياقتاي الامىز دەپ سەنەمىن، – دەدى ول.
