العاش رەت سارىارقا جاقتان تابىلعان ەپيدەميا قۇت دارىعان مەكەندى اينالىپ وتسە ەكەن دەگەن وي ورىندالمادى. وكىنىشتىسى سول الماتى وبلىسىنان دا ىندەتتىڭ ىلمەگىنە ىلىنگەن جان تابىلدى. ءبىرى جازىمىش دەسە، ەندى ءبىرى شەت ەل كەزگەننىڭ كەسىرى دەپ جاتتى. حوش، ايىپ تاعاتىن ۋاقىت جوق. مەملەكەتتىڭ باستى بايلىعى –حالىق. سوندىقتان بيلىكتەگىلەر بۇقارانىڭ اماندىعىن الدىڭعى ورىنعا شىعارىپ، قولدا بار كۇشتى جۇمىلدىرۋدا.
بارشاڭىزعا بەلگىلى جەتىسۋ ءوڭىرى ءار قاشان العاشقىلادىڭ ءبىرى بولىپ باستامانى قولداۋشىلاردىڭ قاتارىندا. بۇل جولى دا ايماق داستۇردەن جاڭىلمادى. سىن ساعاتتا سىناتىن حالىق ءبىز ەمەس دەپ، بىلەك سىبانا كىرىسىپ كەتتى.
وسى رەتتە وبلىس ورتالىعىنان بولەك، شالعاي جاتقان اۋداندار وزىنە قاراستى ەلدى مەكەندە جەرگىلىكتى ۆەتەرەنارلىق ستانسياسى ادام اياعى ارىلمايتىن ورتالىق الاڭ، بالاباقشا، ويىن الاڭدارى جانە ايالدامالاردى زالالسىزداندىرىپ، تازالىق جۇمىستارىن جۇرگىزدى.
سونىمەن قاتار، دۇكەن، مەيرامحانا، قوعامدىق تاماقتانۋ ورىندارى جانە ءسان سالوندارىنا ۆيرۋستان قورعانۋ جولدارى جازىلعان ارنايى نۇسقاۋلىقتار تاراتتى. ەلدىڭ بىرلىگى مەن ەلدىگى سىنالعان شاقتا «ءبىر جاعادان باس، ءبىر جەڭنەن قول شىعاردى» دەگەن وسى ەمەس پا؟
تۇتاس مەملەكەتكە تونگەن قاتەردەن رەسپۋبليكالىق ماشتابتا شەگارانى جاۋىپ كەسەلدەن ساقتانۋدىڭ جولىن جاساسا، ءبىزدىڭ وڭىردە جەتىسۋدىڭ باس شاھارى تالدىقورعان قالاسىنىڭ اينالاسىنا تاۋلىك بويى جۇمىس ىستەيتىن 4 سانيتارلىق بەكەت ورنالاستىرىلدى. ونداعى پوليسيا مەن سەس ماماندارى قالاعا كىرگەن ادامداردى تەكسەرەدى! وسىلايشا، قاتەرلى اۋرۋدىڭ اپانىنان تۇرعىنداردى امان الىپ قالماقشى.
«اتى جامان» دەرتپەن كۇرەسۋدەگى كۇش مەديسينا قىزمەتكەرلەرىنە تۇسكەنى جاسىرىن ەمەس. وبلىستاعى بىلىكتى ماماندار پاندەميا كەزىندە پەندە اتاۋلىنىڭ احۋالىنا نۇقسان كەلمەۋى ءۇشىن ءبىر قاتار ۋاقىتشا وزگەرىستەر ەنگىزىپ، ەلدىڭ دەر كەزىندە ەم الۋىنا قولايلى جاعداي جاساپ وتىر.
ماسەلەن، وبلىستىق دەنساۋلىق ساقتاۋ باسقارماسىنىڭ شەشىمىمەن الماتى قالاسىندا جۇكتىلىك بويىنشا تىركەۋدە تۇرعان ايەلدەر ءدال قازىرگى تۇرعىلىقتى جەرى بويىنشا الماتى وبلىسىنىڭ كەز كەلگەن مەديسينالىق مەكەمەسىنە كەدەرگىسىز تىركەلىپ، اۋرۋحاناعا جاتقىزىلادى ول ءبىرىنشى ەنگىزىلگەن جاڭا ەرەجە.
اتالعان باسقارمانىڭ باسشىسى باۋىرجان ىسقاقتىڭ تىكەلەي تاپسىرماسىمەن ورتالىق اۋداندىق اۋرۋحانالاردا كوروناۆيرۋسقا قاتىستى جاريالانعان جالعان اقپاراتتى انىقتايتىن ءموبيلدى توپ قۇرىلدى.
- «الماتى قالاسىمەن شەكارالاس اۋدانداردىڭ گەمودياليز دياگنوزى بويىنشا ەمدەلۋشىلەرىن اۋداندىق اۋرۋحانادان الماتى كوپسالالى كلينيكالىق اۋرۋحاناعا جەدەل جاردەم كولىگىمەن جەتكىزەدى. بالالارعا ەكپە سالۋعا شەكتەۋ قويىلعان جوق.
ءبىراق، مەديسينالىق مەكەمەگە كەلەتىن اتا-انالار كوروناۆيرۋسقا قاتىستى بارلىق ساقتىق شارالارىن ساقتاۋعا مىندەتتى.
مۇنى بالعىنداردىڭ كەمەل كەلەشەگى ءۇشىن قابىلدانعان شەشىم دەپ ءتۇسىنۋ كەرەك»، - دەيدى الماتى وبلىسى بويىنشا دەنساۋلىق ساقتاۋ باسقارماسىنىڭ باسشىسى باۋىرجان ەربوزىم ۇلى.
ودان باسقا، ايماقتىق كوپسالالى كلينيكا دا جاڭا ەرەجەلەر ەنگىزىلدى. ونداعى وزگەرىستەرگە سايكەس، ورىن العان جاعدايعا بايلانىستى ەمدەۋ مەكەمەسىنە وزگە ادامدار مەن كولىكتىڭ كىرۋىنە تىيىم سالىنعان. جانە دە ەم الۋشىنىڭ جاقىندارى تاعام مەن قاجەتتى زاتتاردى كۇنىنە ءبىر رەت ساعات 16:00-17: 00 ارالىعىندا كلينيكانىڭ قىزمەتكەرلەرى ارقىلى جەتكىزەدى.
ەسكەرتەتىن جايت ەمحاناعا مامانداردىڭ قابىلداۋىنا جازىلعان پاسيەنتتەرگە عانا كىرۋگە رۇقسات ەتىلەدى. مىنە وسى تەكتەس جۇمىستار وبلىس اۋماعىندا قارقىندى جۇرگىزىلىپ جاتىر.
«دەنى ساۋ ۇرپاق جارقىن بولاشاق كەپىلى» ەكەنىن باسشىلىققا الا وتىرىپ، ءوزىڭىزدىڭ جانە جاقىندارىڭىزدىڭ قامىن ءسىز ءبىرىنشى ويلاۋعا ءتيىسسىز. ءاپ، ساتتە سانسىز ەلدى سابىلدىرعان ەپيدەميانىڭ قۇرساۋىنان امان قالۋعا جازسىن. سولاي دەيىك، سولاي بولارىنا سەنەيىك.
انار سابىروۆا
الماتى وبلىسى
