Alǵash ret Saryarqa jaqtan tabylǵan epidemiia qut daryǵan mekendi ainalyp ótse eken degen oi oryndalmady. Ókinishtisi sol Almaty oblysynan da indettiń ilmegine ilingen jan tabyldy. Biri jazymysh dese, endi biri shet el kezgenniń kesiri dep jatty. Hosh, aiyp taǵatyn ýaqyt joq. Memlekettiń basty bailyǵy –halyq. Sondyqtan biliktegiler buqaranyń amandyǵyn aldyńǵy orynǵa shyǵaryp, qolda bar kúshti jumyldyrýda.
Barshańyzǵa belgili Jetisý óńiri ár qashan alǵashqyladyń biri bolyp bastamany qoldaýshylardyń qatarynda. Bul joly da aimaq dástúrden jańylmady. Syn saǵatta synatyn halyq biz emes dep, bilek sybana kirisip ketti.
Osy rette oblys ortalyǵynan bólek, shalǵai jatqan aýdandar ózine qarasty eldi mekende jergilikti veterenarlyq stantsiiasy adam aiaǵy arylmaityn ortalyq alań, balabaqsha, oiyn alańdary jáne aialdamalardy zalalsyzdandyryp, tazalyq jumystaryn júrgizdi.
Sonymen qatar, dúken, meiramhana, qoǵamdyq tamaqtaný oryndary jáne sán salondaryna virýstan qorǵaný joldary jazylǵan arnaiy nusqaýlyqtar taratty. Eldiń birligi men eldigi synalǵan shaqta «bir jaǵadan bas, bir jeńnen qol shyǵardy» degen osy emes pa?
Tutas memleketke tóngen qaterden respýblikalyq mashtabta shegarany jaýyp keselden saqtanýdyń jolyn jasasa, bizdiń óńirde Jetisýdyń bas shahary Taldyqorǵan qalasynyń ainalasyna táýlik boiy jumys isteitin 4 sanitarlyq beket ornalastyryldy. Ondaǵy politsiia men SES mamandary qalaǵa kirgen adamdardy tekseredi! Osylaisha, qaterli aýrýdyń apanynan turǵyndardy aman alyp qalmaqshy.
«Aty jaman» dertpen kúresýdegi kúsh meditsina qyzmetkerlerine túskeni jasyryn emes. Oblystaǵy bilikti mamandar pandemiia kezinde pende ataýlynyń ahýalyna nuqsan kelmeýi úshin bir qatar ýaqytsha ózgerister engizip, eldiń der kezinde em alýyna qolaily jaǵdai jasap otyr.
Máselen, oblystyq Densaýlyq saqtaý basqarmasynyń sheshimimen Almaty qalasynda júktilik boiynsha tirkeýde turǵan áielder dál qazirgi turǵylyqty jeri boiynsha Almaty oblysynyń kez kelgen meditsinalyq mekemesine kedergisiz tirkelip, aýrýhanaǵa jatqyzylady ol birinshi engizilgen jańa ereje.
Atalǵan basqarmanyń basshysy Baýyrjan Ysqaqtyń tikelei tapsyrmasymen ortalyq aýdandyq aýrýhanalarda koronavirýsqa qatysty jariialanǵan jalǵan aqparatty anyqtaityn mobildi top quryldy.
- «Almaty qalasymen shekaralas aýdandardyń gemodializ diagnozy boiynsha emdelýshilerin aýdandyq aýrýhanadan Almaty kópsalaly klinikalyq aýrýhanaǵa jedel járdem kóligimen jetkizedi. Balalarǵa ekpe salýǵa shekteý qoiylǵan joq.
Biraq, meditsinalyq mekemege keletin ata-analar koronavirýsqa qatysty barlyq saqtyq sharalaryn saqtaýǵa mindetti.
Muny balǵyndardyń kemel keleshegi úshin qabyldanǵan sheshim dep túsiný kerek», - deidi Almaty oblysy boiynsha Densaýlyq saqtaý basqarmasynyń basshysy Baýyrjan Erbozymuly.
Odan basqa, aimaqtyq kópsalaly klinika da jańa erejeler engizildi. Ondaǵy ózgeristerge sáikes, oryn alǵan jaǵdaiǵa bailanysty emdeý mekemesine ózge adamdar men kóliktiń kirýine tyiym salynǵan. Jáne de em alýshynyń jaqyndary taǵam men qajetti zattardy kúnine bir ret saǵat 16:00-17: 00 aralyǵynda klinikanyń qyzmetkerleri arqyly jetkizedi.
Eskertetin jait emhanaǵa mamandardyń qabyldaýyna jazylǵan patsientterge ǵana kirýge ruqsat etiledi. Mine osy tektes jumystar oblys aýmaǵynda qarqyndy júrgizilip jatyr.
«Deni saý urpaq jarqyn bolashaq kepili» ekenin basshylyqqa ala otyryp, ózińizdiń jáne jaqyndaryńyzdyń qamyn siz birinshi oilaýǵa tiissiz. Áp, sátte sansyz eldi sabyldyrǵan epidemiianyń qursaýynan aman qalýǵa jazsyn. Solai deiik, solai bolaryna seneiik.
Anar SABYROVA
Almaty oblysy
